توكيودا ئىپتار پائالىيىتىگە ياپونلارمۇ قاتناشماقتا
ياپونىيەدە رامىزان خۇشاللىقى، توكيو جامەسى دىيانەت تۈرك مەدەنىيەت مەركىزىدە بېرىلگەن ئىپتارلار بىلەن تېخىمۇ يۇقىرى پەللىگە چىقتى.
تۈركىيە ئاۋازى رادىيوسى خەۋىرى: تۈركىيە دىنىي ئىشلار ئىدارىسىغا قاراشلىق توكيو جامەسى رامىزاندا پايتەختتە ياشايدىغان مۇسۇلمانلار بىلەن ياپون خەلقىنى بىر-بىرى بىلەن يېقىندىن ئۇچراشتۇرماقتا.
ياپونلار كۈندۈزى جامەنى زىيارەت قىلسا، كەچتە ئىپتار ۋاقتىدا مۇسۇلمان كىشىلەر بىلەن ھەمداستېخان بولماقتا.
ئىپتار مۇناسىۋىتى بىلەن ئىسلام دىنىنى چۈشىنىش پۇرسىتىگە ئىگە بولغان ياپون خەلقى، جامە ۋە روزا تۇتۇش توغرىسىدا مەلۇماتلارغا ئىگە بولالايدۇ.
توكيو جامەسىنىڭ ئىمامى ئادەم لەۋەنت ياپونىيەلىك مېھمانلارنى ئالدىنئالا تىزىملىتىش ئۇسۇلى بىلەن قوبۇل قىلىۋاتقانلىقلىرىنى بىلدۈرۈپ، ئىپتاردىن ئىلگىرى جامەنى تونۇشتۇرۇپ، روزا توغرىسىدا مەلۇمات بېرىۋاتقانلىقلىرىنى ۋە ئىسلام توغرىسىدا سوئاللارغا جاۋاب بېرىۋاتقانلىقلىرىنى قەيت قىلدى.
ئۇ مۇنداق دېدى:
«داستېخاندا بىز بىلەن بىللە ئولتۇرۇپ، ئىپتار قىلىش، ئۇلارغا باشقىچە ھېس-تۇيغۇ ئاتا قىلىدۇ. ئەتراپقا قاراپ خۇشاللىقىدىن بۇ يەردە نېمە ئۈچۈن بىرلىكتە ئىپتار قىلىنىدىغانلىقىنى سورىشىدۇ. ئىپتاردىن كېيىن، يەنە زىيارەت ئۈچۈن كېلىدىغانلىقلىرىنى بىلدۈرۈپ، رەھمەت ئېيتقىنىچە خۇشال ھالدا قايتىدۇ.»
