хәлқаралиқ оқуғучилар чанаққәлә зәпирини хатирилиди
чәт әлдики түркләр вә қериндаш хәлқләр идариси-й т б (YTB) хәлқаралиқ оқуғучиларниң чанаққәләдә шеһит болған бовилирини әсләп паалийәт өткүзгәнликини елан қилди.
түркийә авази радийоси хәвири: чанаққәләдә бовилири шеһит болған хәлқаралиқ оқуғучилар хатириләш пирограммиси өткүзди.
й т б ниң бу һәқтики йазма байатида билдүрүлишичә, түркийә оқуш мукапати пирограммиси рамкисида оқуватқан хәлқаралиқ оқуғучилар 18-март шеһитлирини хатириләш күни вә чанаққәлә деңиз зәпириниң 106-йиллиқи мунасивити билән, й т б ниң әнқәрәдики ишханисида «хәлқаралиқ оқуғучиларниң нәзиридә чанаққәлә» пирограммисини уйуштурған.
й т б башлиқи абдуллаһ әрән пирограммида сөз қилип, чанаққәлә зәпириниң маддий вә мәниви җәһәттин нурғун қәһриманлири барлиқини билдүрди.
у чанаққәлә шеһитзарлиқидики қәбрә ташлириға қариған вақитта, балқан райони, кавказ райони вә оттура шәрқтики нурғун шәһәрләрниң исмини көргили болидиғанлиқини әскәртип: «көңүл җуғрапийәмизниң нурғун җайлиридин әҗдадлиримизниң чанаққәләдә шеһит болғанлиқини көрүвалалаймиз. бу әһвал бүгүнки күндиму бизгә чоң савақ болуш маһийитигә игә. чанаққәлә шеһитзарлиқи бизниң қериндаш икәнликимизни, бир вә баравәр икәнликимизни хатирилитидиған интайин муһим шеһитзарлиқтур. чанаққәлә, үммәтниң рәңлириниң бир байрақ астида топлинип уруш қилған җайидур» деди.
хәлқаралиқ оқуғучилар намида сөз қилған әнқәрә йилдирим бәйазит универстетиниң докторлуқ оқуғучиси косовулуқ әкрәм заҗми: «рахман исимлик бовам чанаққәләдә достлири билән мүрини-мүригә тирәп уруш қилған икән. бовилиримизниң өтмүши, күрәшлири, маканлири вә орунлири охшаш. биз хәлқаралиқ оқуғучиларниңму келәчики охшаш болиду. униңдин дәл 106 йил кейин, анадолуда маарип арқилиқ келәчикимизниң улини қойуватимиз» деди.
