насаниң айға адәм чиқириш пилани кечикиши мумкин
америка аләм қатниши идариси наса (NASA) 2024-йили ай шариға адәм чиқиришни нишан қилған аләм қатниши пирограммилириниң икки йил кечикиши мумкинликини елан қилди.
түркийә авази радийоси хәвири: наса баш мупәттиш ишханиси насаниң ай шариға адәм чиқириш пилани тоғрисида доклат елан қилди.
наса баш мупәттиш ишханиси тәййарлиған вә интернет бетидә елан қилинған доклатта, насаниң «артемис» дәп нам бәргән вәзипә рамкисида, аләмгә қойуп бериш системиси пирограммисиниң иқтисадий чиқимини вә техникилиқ мәсилилирини һәл қилишқа тиришиватқанлиқи билдүрүлди.
мәвҗут мәсилиләрниң насаниң чоң нишаниға тәсир қилиши мумкинлики қәйт қилинған доклатта: «аләмгә қойуп бериш системиси пирограммисини тәрәққий қилдуруш вә бәрпа қилиш үчүн керәклик болған асаслиқ һәр бир тохтамниң чиқими 2 милйард доллар. буларни һәл қилишқа тосалғу болидиған шундақла әң аз дегәндә, пирограммини икки йил кечиктүрүшкә сәвәб болидиған нурғун техникилиқ мәсилиләр бар» дейилди.
насаниң 2020-йиллиқ малийә йили үчүн мәзкур пирограммиға 17 милйард доллардин артуқ пул сәрп қилидиғанлиқи әскәртилгән доклатта йәнә, мундақ дейилди:
«айға чиқиш пирограммисиниң сүритини тезләштүрүш тиришчанлиқиниң, күткәндин техиму қийин вә қиммәт икәнлики, һечкимни һәйран қалдурмаслиқи керәк.»
наса артемис вәзиписи рамкисида, 2024-йилиғичә айға адәм чиқириш сәпәрлирини қилишниң мәқсәт қилғанлиқини, 2028-йилиғичә давамлишидиған сәпәрләрдин кейин, ай шариниң орбитасида аләм понкити қуруп вә униңдин қаңқиш тахтийи сүпитидә пайдилинип, марсқа адәм чиқириш сәпәрлирини башлашни мәқсәт қилғанлиқини елан қилған иди.
