боснийәдики приҗедор шәһиридә өлтүрүлгән бошнақлар дәпнә қилиниду

боснийәдики урушта шималдики приҗедор (Prijedor) шәһири вә әтрапида серблар тәрипидин рәһимсизләрчә өлтүрүлгән 86 қурбанниң мейити әтә (20-ийул) йәрликкә қойулиду.

1238959
боснийәдики приҗедор шәһиридә өлтүрүлгән бошнақлар дәпнә қилиниду

түркийә авази радийоси хәвири: бүгүн (19-ийул) 86 қурбанниң мейити сански мост (Sanski Most) шәһәр мәркизидин приҗедор шәһиригә апирилиду вә мурасим өткүзүлиду. арқидин мейитларниң йуртлиридики қәбристанлиқларға дәпнә қилиниду.

бу йил дәпнә қилинидиған 86 қурбанниң ичидә әң йаш үч киши самир гарибовиҗ, әмин дҗонлагиҗ вә суад клаҗиҗ болуп, улар   19 йаш. әң чоңи 61 йашлиқ бәҗир бәсиҗ.

боснийәдики уруш йеңидин башланған 1992-йили март ейида, сабиқ йугославийәдики дөләт бихәтәрлик тәшкилатиниң башлиқи болған серб симо дрлҗаҗа (Simo Drljaca), приҗедордики 13 сақчи понкитида хизмәт қилидиған 1775 сербни бир ай ичидә қоралландуриду.

серб қисимлири 1992-йили 29-апрел кечиси әйни вақитта нопусиниң көп қисми бошнақ болған приҗедор шәһирини қолға киргүзиду. еғир типлиқ қораллар билән қоралланған серб қисимлири 1992-йили 23-май приҗедор әтрапидики йезиларға һуҗум қилип, 102 кичик балини өз ичигә алған 3176 пуқрани рәһимсизләрчә қирғин қилиду.

серблар 1992-йили 31-май йәрлик радийоларда уқтуруш қилип, «серб болмиғанларниң өйлириниң деризилиригә ақ рәхт есишини, кочиға чиққанда қолиға ақ лента чегиш» ни тәләп қилиду.

ишғалчи сербларниң буйруқиға бойсунушқа мәҗбур болған серб болмиған пуқралар, бу усул билән ениқлиниду. ениқланғанлар әсирләр җаза лагериға әвәтилиду, рәһимсизләрчә қийин-қистаққа елиниду вә айақ-асти қилиниду.

приҗедорлуқ тәхминән 30 миң киши әйни вақитта омарска, кератерм, козараҗ, трнополҗе вә манаҗадики җаза лагерлириға солиниду. онмиңларчә киши болса, йурт-маканлиридин мәҗбурий қоғлиниду.



مۇناسىۋەتلىك خەۋەرلەر