srébrénitsa irqiy qirghinchiliqining qurbanliri depne qilindi

yawropada ikkinchi dunya urushidin kéyin yüz bergen eng chong insaniyet tiragédiyesi dep qobul qilinghan we eng az dégende 8 ming 372 boshnaq rehimsizlerche qirghin qilinghan srébrénitsa irqiy qirghinchiliqining qurbanliri depne qilindi.

srébrénitsa irqiy qirghinchiliqining qurbanliri depne qilindi

türkiye awazi radiyosi xewiri: bügün (11-iyul) srébrénitsa irqiy qirghinchiliqida qurban bolghan 33 kishining méyiti potocharidiki xatire qebristanliqida yerlikke qoyuldi.

türkiye yashliq we tenterbiye ministiri mehmet muherrem kasapoghlu we bir qanche parlamént ezaliri ishtirak qilghan jinaza we xatirilesh murasimigha, bosniye-gértségowinadiki xelqaraliq teshkilatlarning wekilliri, siyasetchiler, diplomatlar, diniy ölimalar we dölet ichi-sirtidin kelgen minglarche kishi qatnashti. kishiler potochari xatire qebristanliqigha gülchembirekler qoydi.

péshin namizidin kéyin, 33 qurbanning méyit namizi oquldi. bosniye-gértségowina diyanet ishliri idarisining bashliqi hüseyin kawazowich srébrénitsada yüz bergen irqiy qirghinchiliqning ikkinchi qétim héchqandaq yerde yüz bermeslikini we héchkimning béshigha kelmeslikini télep dua qildi. dua-télawettin kéyin, 33 qurbanning isim-sheripi birmu bir oquldi we méyitlar yaxshi köridighan yéqinliri teripidin yerlikke qoyuldi.

potochari xatire qebristanliqigha depne qilinghan qurbanlarning sani bügün yerlikke qoyulghanlar bilen 6 ming 643 ke chiqqan boldi.

bügün méyiti yerlikke qoyulghan 33 qurbanning ichidiki eng kichik osman jiwrik 16 yash, eng chongi saha jiwrik 82 yash.



مۇناسىۋەتلىك خەۋەرلەر