dunyada otturiche ömür körüsh nisbiti ashti
dunya sehiye teshkilati doklat élan qilip, otturiche ömür körüsh nisbitining ashqanliqini, tereqqiy qilghan döletlerde bu nisbetning téximu yuqiriliqini bildürdi.
türkiye awazi radiyosi xewiri: dunya sehiye teshkilati élan qilghan «dunya sehiye istatistika doklati» gha asaslanghanda, 2000-yilidin 2016-yillirighiche otturiche ömür körüsh nisbiti 5.5 yil éship, 66.5 yashtin 72 yashqa chiqqan.
doklatta körsitilishiche, otturiche ömür körüsh nsbitide kishi béshigha chüshken kirim izchil halda belgilesh xaraktérlik rol oynighan. kirim menbesi töwen bolghan döletlerdiki otturiche ömür körüsh nisbiti kirimi yuqiri döletlerge sélishturulghanda, 18.1 yil töwen iken.
doklatta, 2019-yilida 75 milyoni oghul, 68 milyoni qiz bolup jemiy141 milyon bowaqning tughulidighanliqi texmin qilinghan bolup, oghullarning 69.8 yil, qizlarning 74.2 yil yashaydighanliqi qeyt qilindi.
doklatta qeyt qilinishiche, yaponiyelikler bilen shiwéysariyelikler eng uzun ömür köridighan bolup, yaponiyening otturiche ömür körüsh nisbiti 84 yash, shiwéytsariyening 83 yash iken. ottura afriqa jumhuriyiti bilen lésotoda kishiler 52 yashtin 53 yashqiche ömür köridighan bolup, otturiche ömür körüsh nisbiti eng töwen döletler iken.
tunji qétim jinsiyetni asas qilghan otturiche ömür körüsh nisbiti istatistika qilinghan doklatta, tereqqiy qilghan döletlerni öz ichige alghan halda ayallarning erlerge qarighanda uzun ömür köridighanliqi bildürüldi.
doklatta, ayallarning erlerge qarighanda sehiye xizmetlirige érishish nisbitining yuqiri ikenliki, erlerning aldini élishqa bolidighan yaki dawalap saqaytqili bolidighan késellikler we qatnash weqesi bilen ölüsh nisbitining ayallargha qarighanda yuqiri ikenliki eskertildi.
