бәйазит дөләт кутупханиси дунйаниң әң гүзәл 10 заманиви кутупханисиниң бири болуп талланди
истанбулдики бәйазит дөләт кутупханиси «дунйаниң әң гүзәл 10 заманиви кутупханиси» қатаридин орун алди.
түркийә авази радийоси хәвири: кутупхана , америка қошма иштатлирида елан қилинған «Wired» намлиқ мәдәнийәт вә технологийә журнилиниң таллишида, әң гүзәл 10 заманиви кутупхана тизимликидә төтинчи рәттин орун алди.
«кутубханәи умуми османи» дегән нам билән 1884 – йили қурулған кутупханиниң әслигә кәлтүрүш вә ички лайиһәләш хизмәтлири табанлиоғлу бинакарлиқ ширкити тәрипидин ишләнди. кутупханида йерими китаб болуп җәмий бир милйонға йеқин материйал оқурмәнлири билән дидарлашмақта. китабларниң 11120 данисини наһайити муһим әсәрләрни өз ичигә алған қолйазма әсәрләр тәшкил қилиду.
«Wired» журнили тәрипидин тәййарланған тизимликтә, 30 миң кивадрат метирлиқ орни билән сикандинавийә дөләтлиридики әң чоң кутупхана болған данийәдики док I кутупханиси биринчи қатардин орун алди.
тизимликкә асасән америка қошма иштатлириниң вермонт иштатидики лавренс хәлқ кутупханиси иккинчи, хитайниң җин йүән шәһиридики йаңҗу җоңшуге кутупханиси үчинчи, бәйазит хәлқ кутупханиси төтинчи, норвегийәдики веннесла кутупханиси бәшинчи, бодо хәлқ кутупханиси алтинчи, америкиниң чикако хәлқ кутупханиси йәттинчи, әнглийәдики 400 миң парчидин артуқ әсәр қойулған бирмиңхам кутупханиси сәккизинчи, канададики халифакс мәркизий кутупханиси тоққузинчи, мексикиниң конарте кутупханиси онинчи болған.
