eren: menpeet we küch toqunushliri dunyagha muqimsizliqni éksport qilmaqta
türkiye radiyo-téléwiziye idarisi- t r t(TRT) bash mudiri ibrahim eren «t r t world munbiri» ning, dunyada yüz bériwatqan toqunushlarning hel qilinishi üchün paydiliq netijilerni otturigha chiqirishini ümid qilidighanliqlirini éytti.
türkiye awazi radiyosi xewiri: t r t bash mudiri ibrahim eren: «parchilinip ketken dunyada tinchliq we xewpsizlikni qaytidin oylinish» témisida istanbulda chaqirilghan t r t world munbirining échilishida muhim söz qildi. u t r t ailisi bolush süpitide emelge ashurulghan eng muhim layihelerdin biri bolghan t r t world munbirining ikkinchisining emelge ashurulghanliqidin intayin xushalliq hés qilghanliqlirini bildürdi.
u dunya miqyasida ishench we muqimliq böhranliri yüz bergen bir mezgilde mesililerni bir yerge jem bolghan asasta talash-tartish qilish we hel qilish chariliri tépishning intayin muhim ehmiyetke ige ikenlikini eskertti. u bu qarashlarni chiqish qilip ötküzgen t r t world munbiride, dewrning éniqsizliqigha diqqetni tartip, özgirishke qandaq ilham bolush mumkinlikini talash-tartish qilghanliqlirini xatiriletti.
u mundaq dédi:
«nurghun oxshimighan sahede yüz bergen küch we menpeet toqunushliri dunyagha muqimsizliqni éksport qilishni dawamlashturmaqta. bu toqunushlardin özini baqidighan qoral sodigerliri, menpeet lobiliri térrorluq teshkilatlirining mewjutluqini ilgiri sürüp insaniyetning bixeterlikige tehdit salmaqta.»
u yene mundaq dédi:
«minglarche kishining jénigha zamin bolghan süriye we yemendiki ichki urushlarning tesirliri, dunyada pütün shiddetlik küchi bilen dawamliq hés qilinmaqta. bu urushlarning tesirige uchrighan milyonlarche kishi jénini saqlap qélish üchün intayin qiyin sharaitlargha qarimay, özlirining we balilirining hayatini dogha tikish bedilige bashqa döletlerde yashash heqqi izdeshke mejbur bolmaqta. bularning köpinchisi türkiyede yashash heqqige érishkenlerdek teleylik emes.»
u b d t teripidin «étnik tazilash» dep atalghan rohingya musulmanliri duch kelgen zulum we irqiy ayrimichiliqlarning künséri éshiwatqanliqini, nöwettiki weziyette pelestin üchün adil hel qilish charisi tépish éhtimalining barghanséri aziyiwatqanliqini, pelestinliklerning yashash sharaitlirining téximu qiyinlishiwatqanliqini qeyt qildi.
u yawropada yéqinqi waqitlarda yuqiri örlewatqan islam qorqunchi we chet elliklerdin nepretlinish xahishining yéngi parchilinishlargha seweb boluwatqanliqini eskertti.
u t r t world munbirining mesililerni talash-tartish qilish we yéngi hel qilish charilirini otturigha qoyush meqsitide emelge ashurulghanliqini bildürüp: «dölitimizning yéqinqi yillarda qolgha keltürgen tereqqiyati we élip barghan islahatliri bilen, bolupmu t r t ning <t r t world>, <t r t erebche>, <t r t kurdi>, <t r t awaz> qatarliq qanalliri bilen xelqaraliq sehnilerdiki tesiri we ehmiyiti künséri éshiwatidu. pirogrammilirimizda körünmigenlerni körsitishni, awazi anglanmighanlargha mikrofon uzitishni dawamlashturuwatimiz we buningdin kéyinmu dawamlashturimiz» dédi.
u ikki kün boyiche axbaratqa yépiq we ochuq shekilde yighinlarning ötküzülidighanliqini, dunyadiki nurghun döletlerdin kelgen mutexessisler, siyasetchiler, pikriy jehettiki bashlamchilar, akadémiklar, siyasiy aktiplar duch kelgen mesililerge, ademni merkez qilghan hel qilish chariliri tépishqa tirishidighanliqlirini we parchilinshini qandaq azaytish mumkinlikining muzakire qilinidighanliqini bildürdi.
u axirida, bügün (3-öktebir) istanbulgha kelgen 600 din artuq söz qilghuchining tejribiliri we bilimidin paydilinilidighanliqini bildürdi we: «bu munberning dunyada yüz bergen toqunushlarning hel qilinishi üchün paydiliq netijilerni otturigha chiqirishini ümid qilimen» dédi.
