ئالبانىيە مۇستەقىللىقىنىڭ 104-يىللىقى ئەنقەرەدە قىزغىن تەبرىكلەندى
تۈنۈگۈن (29-نويابىر) ئالبانىيەنىڭ ئەنقەرەدىكى ئەلچىخانىسىدا، ئالبانىيە مۇستەقىللىقىنىڭ 104-يىللىقى قىزغىن تەبرىكلەندى.
تۈركىيە ئاۋازى رادىيوسى خەۋىرى: تۈنۈگۈن ئەنقەرەدە ئالبانىيە مۇستەقىللىقىنىڭ 104يىللىقى تەبرىكلەندى. ئالبانىيە باش ئەلچىسى گېنتى گاژېلى ئالبانىيەنىڭ مۇستەقىل بولغانلىقىنىڭ 104-يىللىقى تەبرىكلەنگەن كېچىلىككە قەدەم تەشرىپ قىلغان مېھمانلارنى ئالدىغا چىقىپ كۈتۈۋالدى. نۇرغۇن مېھمانلار قاتناشقان تەبرىكلەش كېچىلىكىگە، تۈركىيە ھۆكۈمىتىگە ۋاكالىتەن مۇئاۋىن باش مىنىستىر ۋەيسى قايناق، ئارمىيە باش ئىشتاب باشلىقى ھۇلۇسى ئاكار ۋە باشقا دۆلەتلەرنىڭ ئەنقەرەدىكى ئەلچىخانىلىرىنىڭ مەسئۇل خادىملىرى قاتناشتى.
مۇئاۋىن باش مىنىستىر ۋەيسى قايناق، باش ئىشتاب باشلىقى ھۇلۇسى ئاكار ۋە باش ئەلچى گېنتى گاژېلى ئالبانىيە مۇستەقىللىقىنىڭ 104-يىللىقىغا ئاتاپ پىشۇرۇلغان تورتنى بىرلىكتە كەستى. كېچىلىكتە مىللىي سازلار بىلەن خەلق سەنئەت نومۇرلىرى كۆرسىتىلدى. مېھمانلارغا ئالبانىيە يېمەكلىرى تەقدىم قىلىندى.
