yawropa ittipaqi süriyege qaritilghan émbargolarni yenggillitishni muzakire qilidu
yawropa ittipaqi komitéti tashqi munasiwetler bayanatchisi anwar el anoni tashqi ishlar ministirlirining kéler qétimliq yighinida, süriyege qaritilghan émbargolarni yenggillitish mesilisining muzakire qilinidighanliqini bildürdi.
2230206

yawropa ittipaqi komitéti tashqi munasiwetler bayanatchisi anwar el anoni yawropa ittipaqi wekiller ömikining demeshiqtiki yéngi hökümet bilen élip barghan uchrishishlardin kéyin, süriyening qayta qurulushi üchün émbargolarning emeldin qaldurulup-qaldurulmaydighanliqigha munasiwetlik soalgha jawab berdi.
u yawropa ittipaqi aliy wekili kazha kallasningmu 12-yanwar seudi erebistan paytexti riyadta échilghan «süriye» témiliq yighingha qatnashqanliqini eskertip: «aliy wekil pars qoltuqi döletliri, ottura sherq we yawropadiki munasiwetlik rehberler bilen süriyediki qiyinchiliqlar toghrisida özara pikir almashturdi. riyadta teleplirimizni we süriye xelqining teleplirini qandurush sherti astida, süriye hökümiti bilen dawamliq alaqe qilish we ulargha yardem qilishni kapaletke ige qilish toghrisida pikir hasil qilindi» dédi.
u émbargolar üstide toxtilip: «émbargolarmu muzakire qilinghan témilarning biri boldi. yawropa ittipaqi tashqi ishlar ministirliri biryussélda échilidighan kéyinki qétimliq yighinida, émbargolarni yenggillitish mesilisini muzakire qilidu» dédi.
yawropa ittipaqining émbargoliri süriyede ichki urush partlighandin kéyin, 2011-yili may éyida bashlanghan idi.
beshshar eset hakimiyitige, kishilik hoquq depsendichiliklirige chétilghan kishilerge wiza bérishni cheklesh, mal-mülüklirini tonglitish qatarliq tedbirler yolgha qoyulghan idi.
texti örülgen beshshar esedtin ministirlarghiche bolghan hakimiyetning ichki qisimliridin orun alghan kishiler, émbargo tizimlikige kirgüzülgen idi.
buningdin bashqa, yawropa ittipaqi süriyege sanaet we pul-muamile séktorliri sahesidimu émbargo yürgüzgen idi. mesilen, néfit we néfit mehsulatlirini import qilish, sanaet we herbiy sanaette shundaqla uchur-alaqide qollinilidighan mallarni süriyege éksport qilish cheklengen idi.
bu émbargolar süriye igilikining asasiy ul-eslihe türlirigimu meblegh sélishnimu öz ichige alghan idi.
مۇناسىۋەتلىك خەۋەرلەر

parizhda süriye mesilisi yighini ötküzüldi
firansiyening paytexti parizhda xelqara süriye mesilisi yighini chaqirildi.