ھاماس: غەززەدە ئۇرۇش توختىتىش ۋە ئەسىر ئالماشتۇرۇش كېلىشىمى ئاخىرقى باسقۇچقا كىردى

پەلەستىن ئىسلامىي قارشىلىق كۆرسىتىش ھەرىكىتى — ھاماس ئىسرائىلىيە بىلەن سۆھبەت ئېلىپ بېرىلىۋاتقان قاتارنىڭ پايتەختى دوھادا، غەززەدە ئۇرۇش توختىتىش ۋە ئەسىر ئالماشتۇرۇش توغرىسىدىكى كۈتۈلۈۋاتقان كېلىشىمنىڭ ئاخىرقى باسقۇچىغا يېتىپ كەلگەنلىكىنى جاكارلىدى.

2230446
ھاماس: غەززەدە ئۇرۇش توختىتىش ۋە ئەسىر ئالماشتۇرۇش كېلىشىمى ئاخىرقى باسقۇچقا كىردى

ھاماس يازما بايانات ئېلان قىلىپ: «ئۇرۇش توختىتىش ۋە ئەسىر ئالماشتۇرۇش كېلىشىمى ئاخىرقى باسقۇچىغا يەتتى» دېدى.

باياناتقا ئاساسلانغاندا، پەلەستىنلىك ئەمەلدارلار كېيىنكى باسقۇچ ئۈچۈن زۆرۈر بولغان تەييارلىقلارنى قىلىشنىڭ ئىنتايىن مۇھىم ئىكەنلىكىنى تەكىتلىگەن. ئەمەلدارلار بۇ سۆھبەت باسقۇچىنىڭ «ئوچۇق ۋە كەڭ دائىرىلىك كېلىشىم» بىلەن نەتىجىلىنىدىغانلىقىدىن ئۈمىدار ئىكەنلىكىنى قەيت قىلىشقان.

قاتار، مىسىر ۋە ئامېرىكا قوشما ئىشتاتلىرىنىڭ ۋاسىتىچىلىكىدە ھاماس بىلەن ئىسرائىلىيە ئارىسىدا ئېلىپ بېرىلىۋاتقان ۋاسىتىلىك سۆھبەتلەر، ئەسىر ئالماشتۇرۇش ۋە ھۇجۇملارنىڭ توختىتىلىشى بىلەن مۇناسىۋەتلىك ئاخىرقى كېلىشىمنى شەكىللەندۈرۈش تىرىشچانلىقلىرىنى ئۈزلۈكسىز داۋاملاشماقتا.

ئىسرائىلىيە باش ۋەزىرى بېنيامىن نېتانياھۇ يۇقىرى دەرىجىلىك ئىسرائىلىيە سۆھبەت ئۆمىكىنى غەززەدە ئۇرۇش توختىتىش ۋە ئەسىر ئالماشتۇرۇش سۆھبەتلىرى ئېلىپ بېرىلىۋاتقان قاتارغا ئەۋەتىشنى قارار قىلغان بولۇپ، تاشقى ئىستىخبارات ئىدارىسى موسساد باشلىقى داۋىد بارنېئا ۋە ئىچكى ئىستىخبارات ئىدارىسى شىن-بەت (شاباك) باشلىقى رونېن بار قاتارلىقلارمۇ ئورۇن ئالغان سۆھبەت ئۆمىكى دوھاغا كەتكەنىدى.

ئىسرائىلىيە مەتبۇئاتلىرىدا ئېلان قىلىنغان خەۋەرلەردە، ئىسرائىلىيە بىلەن ھاماس ئارىسىدىكى ئەسىر ئالماشتۇرۇش كېلىشىمىنىڭ تەپسىلاتلىرىنىڭ 90 پىرسەنتى ئۈستىدە كېلىشىم ھاسىل قىلىنغانلىقى ئىلگىرى سۈرۈلگەنىدى.

ئىسمىنى ئاشكارىلاشنى خالىمىغان پەلەستىنلىك مەنبەلەرمۇ ئۇرۇش توختىتىش ۋە ئەسىر ئالماشتۇرۇش كېلىشىمىنىڭ ئاساسەن تەييار بولغانلىقىنى بىلدۈرگەنىدى.



مۇناسىۋەتلىك خەۋەرلەر