somali bilen éfiyopiye otturisida «enqere bayannamesi» imzalandi

dölitimiz (türkiye jumhuriyiti) jumhur reisi rejep tayyip erdoghan paytext enqerede somali pirézidénti hesen sheyx mehmud we éfiyopiye bash ministiri abiy ehmed bilen körüshti.

erdoghan aldi bilen somali pirézidénti hesen sheyx mehmud we uning hemkarliqidiki heyetni qobul qildi hem söhbet ötküzdi.

jumhur reis erdoghan kéyinche éfiyopiye bash ministiri abiy ehmed we uning hemkarliqidiki heyet bilen körüshti.

uchrishishlardin kéyin, somali bilen éfiyopiye otturisida «enqere bayannamesi» imzalandi.

terepler bu bayanname arqiliq ixtilapliq we talash-tartishliq mesililerni bir chetke qayrip, ortaq güllinish yolida hemkarliq asasida qetiy algha ilgirilesh toghrisida ortaq tonush hasil qilghanliqlirini jakarlidi.

türkiye jumhuriyiti jumhur reislik mehkimisi uchur – alaqe ishliri idarisi bashliqi fahrettin altun mezkur bayanname heqqide élan qilghan  bayanatida mundaq dédi:

«somali bilen éfiyopiye otturisida imzalanghan ‹enqere bayannamesi› afriqadiki xelqler we döletlerning türkiyege chongqur ishinidighanliqining eng roshen namayendisidur.»

altun ammiwi ortaqlishish tor bétidiki sehipiside bu heqte élan qilghan bayanatida mundaq dédi:

«türkiyening muressechilikide somali bilen éfiyopiye otturisida hasil qilinghan bu kélishimning, bolupmu ikki dost döletke, shundaqla pütkül rayon, qite we dunyayimizgha tinchliq, xatirjemlik we muqimliq élip kélishige tilekdashmiz.»