amérika süriye toghrisida bayanat élan qildi

amérika dölet xewpsizlik meslihetchisi jéyk sulliwan amérikaning «‹ABC› téléwiziye qanili» ning «xeyrilik seher amérika» pirogrammisigha qatnashti we süriyediki özgirishler heqqide toxtaldi.

u süriyede beshshar esed hakimiyitining axirlishishi we rayonda iran bilen rusiyening «ajizlishishi» din memnun ikenliklirini bildürüp mundaq dédi:

«esed yüz minglighan kishining öltürülüshi, diniy we az sanliq étnik milletlerning zulumgha uchrishining jawabkari idi.

esed axirida qollighuchisisiz, yalghuz we himayisiz haletke chüshüp qaldi. shuning bilen, qéchishqa mejbur boldi. qilmishliri üchün jawab béremdu? bu köp jehettin rusiyening néme üchün bir qatil diktatorgha panahliq hoquqi béridighanliqigha baghliqtur.»

sulliwan yéngi basquchta otturigha chiqqusi xewp - xeterlerge qarita hushyar halette turuwatqanliqlirini eskertti, hemde süriyede amérikaning menpeetlirige tehdit shekillendürgüsi guruppilar we daéshning qayta janlinishining aldini élish mesiliside hushyar ikenliklirini tekitlidi.

u amérikaning süriyede buningdin kéyin qandaq özgirishlerning bolidighanliqigha qarita pozitsiyesi heqqide mundaq dédi:

«süriyede muqim, hemmige quchaq achidighan we kélechikining démokratiye bolushini arzu qilidighanlarning hemmisi bilen hemkarliq ornitishqa teyyarmiz.»

süriyede 27-noyabir küni (2024) beshshar esed küchliri bilen öktichi qoralliq guruppilar otturisidiki toqunushlar keskinleshkenidi.

7-dékabir küni paytext demeshiqqe kirishke bashlighan guruppilarni xelq ammisimu qollap, qizghin qarshi alghan, buning netijiside beshshar esed hakimiyiti bu yerde we bashqa nurghun rayonlarda kontrolluqni pütünley yoqitip, yimirilgenidi.

yekshenbe küni (2024-yili 8-dékabir) baas partiyesining dölettiki 61 yilliq hakimiyiti axirlashqan bolup, bu hakimiyetning rehbiri beshshar esed paytext demeshiqtin qéchip ketkenidi.