engliye bilen iraq nétanyahuni qattiq eyiblidi

israiliye bash ministiri bényamin nétanyahu süriyede beis partiyesi hakimiyitining aghdurulushidin kéyin, israiliye quruqluqtin ishghal qilish paaliyetlirini köpeytishke urunuwatqan golan égizlikining «israiliye térritoriyesining menggü ayrilmas bir qismi» bolidighanliqini ilgiri sürdi.

bényamin nétanyahu axbarat élan qilish yighinida, israiliye quruqluqtin ishghal qilish paaliyetlirini köpeytishke urunuwatqan, xelqara qanungha asasen süriye zémini hésablinidighan golan égizliki we süriyede esed hakimiyitining aghdurulushi heqqide bayanatlarni berdi.

nétanyahu 1967-yildin buyan israiliyening ishghaliyiti astidiki golan égizlikining «israiliye térritoriyesining menggü ayrilmas bir qismi» bolidighanliqini, israiliyening golan égizlikidiki herbiy mewjudiyitining israiliyening «bixeterliki we igilik hoquqini kapaletke ige qilidighanliqi» ni ilgiri sürdi.

süriyede 61 yilliq beis partiyesi hakimiyitining aghdurulushi toghriliqmu bayanatlarni bergen bash ministir nétanyahu, buning dölitining «hamas, hizbullah we irangha qaritilghan hujumlirining biwasite netijisi» ikenlikini éytti.

u iranning beshshar esed hakimiyitini qoghdap qélish üchün milyardlarche dollar xejligenlikini ilgiri sürdi, hemde beshshar esed hakimiyitini «irandin hizbullahqa baridighan qoral - yaragh liniyesi» dep atidi.

israiliye armiyesi yekshenbe küni bash ministir bényamin nétanyahu we dölet mudapie ministiri yisraél katzning körsetmisi boyiche ishghaliyet astidiki golan égizlikidiki bierep rayongha bésip kirgenidi.

iraq israiliyening golan égizlikidiki biterep rayonning igilik hoquqini depsende qilishini qattiq eyiblidi.

iraq tashqi ishlar ministirliqining bu heqte élan qilinghan bayanatida mundaq déyildi:

 «israiliye armiyesining süriyediki yéqinqi özgirishlerni bahane qilip, ishghaliyti astidiki golan égizlikidiki biterep rayonni bésiwélishini qattiq eyibleymiz. derweqe, bu xelqara qanunning ochuq - ashkara halda depsende qilinishidur.»

engliye tashqi ishlar wazaritining israiliye armiyesining golan égizlikidiki biterep rayonni bésiwélishi heqqide élan qilinghan  bayanatida mundaq déyildi:

«pozitsiyemiz éniqtur, golan égizliki israiliyening ishghaliyiti astidiki zémindur, israiliyening bu yerni bésiwélishini qobul qilmaymiz.»