péskow: esedke panahliq bérish mesilisige putin qarar qilidu

rusiye pirézidéntliq mehkimisi — kirémil bayanatchisi dimitriy péskow paytext moskwada muxbirlargha süriyening nöwettiki weziyiti toghrisida bayanat berdi.

péskow rusiyening beshshar esed we uning ailisidikilerge panahliq bérish qarari toghrisida toxtilip: «buninggha oxshash qararlar pirézidéntning ruxsitisiz élinmaydu. bu uning qarari» dédi.

putinning hazirche beshshar esed bilen körüshüsh pilanining yoqluqini tilgha alghan péskow, beshshar esedning orni heqqide uchur bérishni xalimidi.

péskow rusiyening süriyening himeymim we tartus rayonliridiki herbiy bazilirining ehwalini tilgha élip: «qandaqla bolmisun, bu süriyede hakimiyet yürgüzgüchiler bilen meslihetlishishke tégishlik mesile. hazir özgirish we chékidin ashqan muqimsizliq dewri dawamlashmaqta. shunglashqa, waqitqa hemde estayidil kéngishishke éhtiyaj bar» dédi.

u bu bazilarning bixeterlikige kapaletlik qilish üchün zörür qedemlerning tashlanghanliqini éytti.

péskow rosiye, türkiye we iranning süriye mesilisini hel qilish üchün qurghan astane formatigha isharet qilip: «bu format ehmiyitini yoqatti. bashqa tereptin mezkur döletler otturisidiki pikir almashturush we siyasiy kéngishish méxanizmi süpitide hemishe küchke ige. melum menidin éytqanda, bu meslihetler elwette dawamlishidu» dédi.

dimitriy péskow yene süriye weziyiti toghrisida türkiye we rayondiki bashqa döletler bilen alaqini dawamlashturuwatqanliqini sözlirige ilawe qildi.