b d t süriye heqqide bayanat élan qildi

b d t bash katipi antoniyo gutérrés süriyediki baas partiyesi hakimiyiti aghdurulghandin kéyin, yazma bayanat élan qildi.

gutérrés süriyeliklerning süriyening kelgüsini belgilishi kéreklikini tekitlep, b d t ning süriyediki alahide wekili géyir o.pédérsénning bu yönilishni dawamliq qollaydighanliqini tekitlidi.

gutérrés: «14 yil dawamlashqan wehshiyane urush we mustebit hakimiyet axirlashqandin kéyin, süriye xelqi muqim we tinch kelgüsi berpa qilishtek tarixiy pursetke érishti» dédi.

gutérrés tertiplik siyasiy ötkünchi basquchqa kapaletlik qilish üchün «qilishqa tégishlik nurghun xizmetler» ning barliqini tekitlep: «bu sezgür peytte, zorawanliqtin saqlinish we kemsitishsiz halda barliq süriyeliklerning hoquqini qoghdash chaqiriqimni qayta tekitleymen» dédi.

gutérrés konsullar we diplomatik organlar bilen u yerde xizmet qiliwatqan xadimlarning xelqara qanun boyiche qoghdilishi kéreklikini tekitlidi.

b d t bash katipi süriyeliklerning yarashturush, adalet, erkinlik we güllinish hemmeylenge teng yetküzülidighan bir dölet qurushini qollaydighanliqini bayan qilip, buning süriyening sijil tinchliqining yoli ikenlikini tekitlidi.

süriyede 27-noyabirda hakimiyet küchliri bilen öktichi qoralliq guruppilar arisida toqunushlar keskinleshken idi.

paytext demeshiqqe 7-dékabirda (2024) kirishke bashlighan öktichi guruppilarni xelq ammisiningmu qollap quwwetlishi bilen, hakimiyet demeshiq we bashqa nurghun rayonlarda kontrolluqini pütünley yoqitip, yiqilghan idi.

tünügün (8-dékabir) baas partiyesining dölettiki 61 yilliq hakimiyiti ayaghlashqan we hakimiyet rehbiri beshshar esed paytext demeshiqtin qachqan idi.