үч дөләтниң ташқи ишлар министирлири доһада көрүшиду

русийә ташқи ишлар министири сергей лавров пайтәхт москвада америкалиқ журналист такер карлсон (Tucker Carlson ) ниң зийаритини қобул қилди.

у өзлириниң сүрийәдики йеңи өзгиришләрни йеқиндин көзитиватқанлиқлирини, түркийә вә иран ташқи ишлар министирлири билән нөвәттики вәзийәтни қандақ қилип астана мусаписи пиринсиплири асасида қайта музакирә қилиш мәсилиси тоғрисида көришидиғанлиқини қәйт қилди.

у сүрийә вәзийитиниң бир қәдәр мурәккәп икәнликини әскәртип: «бу бир мурәккәп ойун, ичидә нурғун актийорлар бар. мән бу һәптә пиланланған учришишниң (қатарда) вәзийәтниң муқимлишишиға йардәм қилишини үмид қилимән» деди.

у русийә, түркийә вә иранниң астана мусаписи рамкисида пиланлиқ һалда йиғин ечип келиватқанлиқини, бу йилниң (2024) ахири йаки 2025-йилниң бешида йәнә йиғин чақиришни пилан қилғанлиқлирини қәйт қилди.

у американиң йеңидин сайланған пирезиденти доналд трампниң украина урушини ахирлаштуридиғанлиқи тоғрисида вәдә бәргәнликини вә буниң қандақ шараитта әмәлгә ашидиғанлиқи соалиға:  «14-ийун путин бир қетимлиқ нутқида бу тоғрида тохтилип, 2022-йили истанбулда қобул қилинған пиринсиплар асасида сөһбәткә тәййар икәнликимизни тәкитлигән иди» дәп җаваб бәрди.