lawrow: ukrainaning natogha qoshulushini qetiy qobul qilghili bolmaydu

rusiye tashqi ishlar ministirliqi bayanat élan qilip, ministir sérgéy lawrowning  rusiyede dölet ishliri ziyaritide bolghan wéngiriye tashqi ishlar, qoshumche tashqi soda ministiri pétir sijjarto bilen paytext moskwada körüshkenlikini bildürdi.

söhbet jeryanida, rusiye bilen wéngiriye otturisidiki her qaysi sahelerdiki munasiwetler we xelqaraliq mesililer muzakire qilindi.

ministir sérgéy lawrow söhbetning metbuatlargha ochuq qismida söz qilip, wéngiriye hökümitining özining menpeetini nezerde tutup, musteqil siyaset yürgüzüwatqanliqini éytti.

ukraina kirizisi heqqide toxtalghan lawrow, bu kirizisni hel qilish üchün asasliq seweblerni yoqitish kéreklikini tekitlep: «seweblerning biri, natoning sherqqe qarap ilgirilep, ukrainani öz ichige tartishqa urunushi. bu rusiye chégrasida herbiy tehdit peyda qiliwatidu. rusiye pirézidénti wladimir putin ukrainaning natogha qoshulushining qetiy qobul qilghili bolmaydighanliqini éytti. biz buninggha yol qoymaymiz» dédi.

u ukrainadiki toqunushlarni tonglitip qoyush éhtimalliqi toghrisida toxtilip, «bu tinchliqqa élip baridighan yol emes» dédi we sözini dawamlashturup, biz ukraina bilen dölitimizning qanuniy menpeetlirining keng dairide étibargha élinishini boylap söhbetlishishke teyyarmiz, dédi.