مادۇرو: پەلەستىن دەۋاسى ئىنسانىيەتنىڭ ئەڭ ھەقلىق دەۋاسىدۇر
ۋېنېزۇئېلا پىرېزىدېنتى نىكولاس مادۇرو پەلەستىن دەۋاسىنىڭ ئىنسانىيەتنىڭ ئەڭ ھەقلىق دەۋاسى ئىكەنلىكىنى بىلدۈردى.
نىكولاس مادۇرو ۋېنېزۇئېلانىڭ پايتەختى كاراكاستا ئۆتكۈزۈلگەن «خەلقئارا پەلەستىن بىلەن ھەمنەپەس بولۇش يىغىنى» دا قىلغان سۆزىدە، پەلەستىن دەۋاسىنى ئەڭ كۈچلۈك شەكىلدە قوللاشنى داۋاملاشتۇرىدىغانلىقلىرىنى تەكىتلەپ مۇنداق دېدى:
«ئادىل بىر دۇنيا بەرپا قىلىش ئۈچۈن، ئالدى بىلەن ئۆتكەن ئەسىردىن مىراس قالغان كۈرەشلەرنىڭ سەۋەبلىرىگە قارايدىغان بولساق، پەلەستىن دەۋاسىنىڭ ئىنسانىيەتنىڭ ئەڭ ھەقلىق دەۋاسى ئىكەنلىكىنى كۆرىمىز. دەرۋەقە بۇ، ئىنسانىيەتنى بىرلەشتۈرىدىغان ھەققانىي ۋە ئالەمشۇمۇل بىر دەۋادۇر.»
مادۇرو ئامېرىكا قوشما ئىشتاتلىرى، ياۋروپا ۋە لاتىن ئامېرىكانىڭ ئەسەبىي ئوڭچىللىرىنى ئىسرائىلىيەنىڭ پەلەستىندە يۈرگۈزۈۋاتقان ئىرقىي قىرغىنچىلىقىنىڭ جىنايەت شېرىكى بولۇش بىلەن ئەيىبلىدى، ھەمدە فاشىزم ۋە زىيونىزمغا قارشى دۇنياۋى كۈرەشنىڭ بىر قىسمى سۈپىتىدە پەلەستىن ۋە پەلەستىن خەلقىنىڭ ھەق - ھوقۇقلىرىنى قوغدايدىغانلىقلىرىنى بىلدۈردى.
ئۇ، پەلەستىن خەلقىنىڭ مۇستەقىل دۆلەتكە ئىگە بولۇش ھوقۇقىنى قەتئىي قوللايدىغانلىقلىرىنى تەكىتلەپ مۇنداق دېدى:
«بۇگۈنكى كۈندە بىز پەلەستىندە ئىرقىي قىرغىنچىلىق يۈرگۈزۈلۈۋاتقانلىقىغا شاھىت بولۇۋاتىمىز. بالىلار، ئاياللار ۋە ئەرلەرگە قارشى ھەر كۈنى سادىر قىلىنىۋاتقان جىنايەتلەر ئالدىدا چوڭقۇر ئازابلىنىۋاتىمىز.»
مادۇرو پەلەستىننىڭ ياشاش، مۇستەقىللىق ۋە مەۋجۇت بولۇش ھوقۇقىنى قوغداشنىڭ مۇھىملىقىنى ئەسكەرتتى، شۇنداقلا پەلەستىن دەۋاسىنىڭ ۋېنېزۇئېلا، لاتىن ئامېرىكا ۋە كارىب دېڭىزى رايونىنىڭ مەۋجۇدىيىتىنى ساقلاپ قېلىش ھوقۇقىغا ئوخشاشلا مۇھىملىقىنى تەكىتلىدى.
پىرېزىدېنت مادۇرو ۋېنېزۇئېلانىڭ پەلەستىن ۋە ئوتتۇرا شەرق خەلقلىرى بىلەن ھەمنەپەس ئىكەنلىكىنى ئەسكەرتىپ مۇنداق دېدى:
«ئىنسانىيەتنىڭ ئەڭ مۇھىم ئۇرۇشى ئىنساننىڭ ۋەتىنى ئۈچۈن، پەلەستىننىڭ ئەركىنلىكى ئۈچۈن بولغان ئۇرۇشتۇر. ئادالەتكە ئېرىشىش پەلەستىن خەلقىنىڭ ئەڭ تەبىئىي ھوقۇقىدۇر، دەرۋەقە پەلەستىن خەلقى پۈتكۈل ئىنسانىيەتنىڭ قوللىشى ئاستىدا ھامان بىر كۈنى چوقۇم غەلىبە قىلىدۇ.»
