خەلقئارا جىنايى ئىشلار سوت مەھكىمىسى نېتانياھۇ بىلەن گاللانت ئۈستىدىن تۇتۇش بۇيرۇقى چىقاردى

خەلقئارا جىنايى ئىشلار سوت مەھكىمىسى ئىسىرائىلىيە باش مىنىستىرى نېتانياھۇ بىلەن سابىق دۆلەت مۇداپىئە مىنىستىرى گاللانت ئۈستىدىن غەززەدە ئۇرۇش جىنايىتى ئۆتكۈزگەنلىكى ئۈچۈن تۇتۇش بۇيرۇقى چىقاردى.

2212439
خەلقئارا جىنايى ئىشلار سوت مەھكىمىسى نېتانياھۇ بىلەن گاللانت ئۈستىدىن تۇتۇش بۇيرۇقى چىقاردى

خەلقئارا جىنايى ئىشلار سوت مەھكىمىسى نېتانياھۇ بىلەن گاللانتنىڭ 2013-يىلى 8-ئۆكتەبىردىن 2024-يىلى 20-مايغىچە ئۆتكۈزۈلگەن ئۇرۇش جىنايىتى ۋە ئىنسانىيەتكە قارشى جىنايەتلەرگە جاۋابكار ئىكەنلىكىگە مۇناسىۋەتلىك «مۇۋاپىق  ئاساس» لارنىڭ بارلىقىنى بىلدۈردى.

ھۆكۈمنامەدە مۇنداق دېيىلدى:

«ھەر ئىككى گۇماندار غەززەدىكى پۇقرالارغا يېمەكلىك، سۇ، دورا، يېقىلغۇ ۋە توك قاتارلىق مۇھىم بۇيۇملارنىڭ يەتكۈزۈلۈشىنى قەستەن توسقان. بۇنىڭ ئوزۇقلۇق يېتىشمەسلىك ۋە سۇسىزلىنىش سەۋەبىدىن بالىلارنى ئۆز ئىچىگە ئالغان پۇقرالارنىڭ ئۆلۈشىنى كەلتۈرۈپ چىقارغانلىقى ئېنىقلانغان.»

خەلقئارا جىنايى ئىشلار سوت مەھكىمىسى، ئىسرائىلىيە ئىنسانپەرۋەرلىك ياردەملىرىنىڭ يەتكۈزۈلۈشىگە يول قويغان ئەھۋاللاردىمۇ بۇنىڭ خەلقئارا جەمئىيەتنىڭ بېسىمى ياكى ئامېرىكانىڭ تەلىپى نەتىجىسىدە ئېلىپ بېرىلغانلىقىنى، ياردەمنىڭ ھەرگىزمۇ غەززە خەلقىنىڭ ئېھتىياجىنى قاندۇرۇش سەۋىيەسىگە يەتمىگەنلىكىنى بىلدۈردى.

ھۆكۈمنامەدە يەنە، نېتانياھۇ ۋە گاللانتنىڭ يۇقىرى دەرىجىلىك ئەمەلدارلار بولۇش سۈپىتى بىلەن، غەززەدىكى پۇقرالارغا قەستەن ھۇجۇم قىلىشنىڭ ئالدىنى ئېلىش ئۈچۈن زۆرۈر تەدبىرلەرنى يولغا قويمىغانلىقىمۇ ئورۇن ئالدى.

خەلقئارا جىنايى ئىشلار سوت مەھكىمىسى ئىسرائىلىيەنىڭ مەھكىمىنىڭ سوتلاش ھوقۇقىنى قوبۇل قىلىشىنىڭ ھاجىتى يوقلۇقىنى بىلدۈردى.

مەھكىمە بۇ تۇتۇش بۇيرۇقىنىڭ ئېلان قىلىنىشىنىڭ زىيانكەشلىككە ئۇچرىغۇچىلار ۋە ئۇلارنىڭ ئائىلە-تاۋابىئاتلىرىنىڭ مەنپەئەتىگە ئۇيغۇن ئىكەنلىكىنى ئوتتۇرىغا قويدى.

خەلقئارا جىنايى ئىشلار سوت مەھكىمىسى ئەيىبلىگەن جىنايەتلەر ئىچىدە، زۇلۇم ۋە باشقا ئىنسانىيەتكە خىلاپ قىلمىشلارنى ئۆز ئىچىگە ئالىدىغانلىقىنى ئېلان قىلدى.

سوت مەھكىمىسى يەنە، ئىسرائىلىيەنىڭ خەلقئارا جىنايى ئىشلار سوت مەھكىمىسىنىڭ سوتلاش ھوقۇقىغا بولغان نارازىلىقىنى رەت قىلىپ، پەلەستىن زېمىنىدا سادىر قىلىنغان جىنايەتلەرنى سوتلاش ھوقۇقىمىز بار دەپ ھۆكۈم قىلدى.

خەلقئارا جىنايى ئىشلار سوت مەھكىمىسى 2024-يىلى 26-سېنتەبىر ئىسرائىلىيە سۇنغان سوتلاش ھوقۇقىغا مۇناسىۋەتلىك ئىككى ئەرزنى بىردەك رەت قىلدى.



مۇناسىۋەتلىك خەۋەرلەر