xusiylar amérikaning ikki hujumchi paraxoti we bir awiyamatkisigha hujum qildi

türkiye awazi radiyosi xewiri: xusiylarning herbiy bayanatchisi yehya seri, xusiylarning qizil déngiz we oman déngizida 8 saet dawamlashqan ikki qétimliq hujumni emelge ashurghanliqini élan qildi.

deslepki hujumda oman déngizidiki amérika awiyamatkisi"abraham linkoln" gha uchquchisiz ayropilan we bashqurulidighan bomba bilen hujum qilinghanliqini tilgha alghan yehya seri, amérika yemenge hujum qilishqa teyyarliq qiliwatqan peytte bu hujumning élip bérilghanliqini bildürdi.

yehya seri ikkinchi qétimliq hujumda bolsa, qizil déngizdiki amérikagha tewe ikki hujumchi paraxotni hujum nishani qilghanliqini tekitlidi.  

mezkur hujumlarning pelestin we liwan xelqini qollash üchün élip bérilghanliqini eskertken yehya seri, xusiylarning israiliyege qaritilghan hujumlirin we ghezze rayonidiki qorshawi emeldin qaldurulghuche, ghezze we liwandiki hujumlargha xatime bérilgüche dawamlishidighanliqini tekitlidi.

xusiylarning mudapie ministirliqi meniwi yétekchilik idarisining muawin mudiri abdullah bin amir, amérika küchlirige qarshi aldin herbiy heriket élip bérilghanliqini bildürdi.

bu ariliqta, amérika mudapie ministirliqi (péntagon), amérikaning yemendiki iran qollawatqan xusiylargha qarita hawa hujumi élip barghanliqini élan qildi.

péntagon bayanatchisi général patrik raydér, amérika merkiziy armiye qomandanliqining (CENTCOM) yemendiki xusiylargha tewe bir qanche qoral-yaragh ambirigha hawa hujumi qilghanliqini bildürüp, bu heriketlerning xusiylarning amérika ittipaqdash küchlirige qaratqan hujumlirigha jawab qayturush yüzisidin élip bérilghanliqini éytti.

raydér yene, 11-noyabirda amérika merkiziy armiye qomandanliqigha tewe qisimlarning babulmendeb boghuzidin ötüwatqanda duch kelgen xusiy hujumini muweppeqiyetlik chékindürgenlikini ipadilidi.

raydér ötüsh jeryanida <USS Stockdale> we <USS Spruance> namliq hujumchi paraxotlirining eng az 8 taq yönilishlik hujumgha, uchquchisiz ayropilan hujumigha, 5 paraxot soqar balistik bashqurulidighan bomba hujumigha we 3 paraxot soqar kruz bashqurulidighan bomba hujumigha uchrighanliqini, hujumlarning tosuwélinishi netijiside paraxotlarning ziyangha uchrimighanliqini we héchqandaq xadimning yaridar bolmighanliqini  bildürdi.

raydér, "abraham linkoln" awiyamatkisigha qaritilghan hujum heqqide toxtilip, <bu heqte héchqandaq hujumdin xewirim yoq> dédi.