islam hemkarliq teshkilati bilen ereb elliri ittipaqi birleshme bayanname élan qildi

türkiye awazi radiyosi xewiri: seudi erebistanning paytexti riyadta islam hemkarliq teshkilati – ereb elliri ittipaqi pewquladde birleshme yighini chaqirildi.

yighindin kéyin élan qilinghan birleshme bayannamide, israiliyening xelqara qanunni depsende qiliwatqanliqi, shundaq bolushigha qarimay birleshken döletler teshkilatining éniq tedbir qollinalmaywatqanliqi, bu mesilide xelqara jemiyetning muweppeqiyetsiz bolghanliqi bayan qilindi.

bayannamide xewpsizlik kéngishi «ghezzede ot toxtitishni emelge ashurush we insaniy yardemlerning ghezzege kirishige kapaletlik qilish üchün ijra qildurush küchike ige  qarar maqullashqa chaqiriq qilindi.

israiliyening  birleshken döletler teshkilati omumiy kéngishi yighinigha qatnishishini toxtitip qoyush üchün xelqara jemiyetning qollishini qolgha keltürüsh xizmitining bashlinidighanliqi, bu heqte omumiy kéngeshke qarar layihesi sunulidighanliqi qeyt qilindi.

israiliyening sadir qiliwatqan jinayetlirining musteqil xelqaraliq tekshürülüshi telep qilinghan birleshme bayannamide, barliq döletler «israiliyege qoral-yaragh we oq-dora éksport qilishni yaki ewetishni cheklesh» ke chaqiriq qilindi, israiliyening kishilik hoquq depsendichiliklirini dawamlashturushigha taqabil turush üchün xelqaraliq jaza tedbirlirini qollinish telep qilindi.

bayannamide xelqara edliye sot mehkimisining qararlirimu  eslitilip, bu qararlarning tézdin ijra qilinishi telep qilindi.