birleshken döletler teshkilati pakistanni agahlandurdi
birleshken döletler teshkilati balilar fondi jemiyiti (UNICEF) pakistanning penjab ölkiside körülgen hawa bulghinishi sewebidin 11 milyon balining salametlikining xeter astida ikenliki toghrisida pakistanni agahlandurdi.
türkiye awazi radiyosi xewiri: birleshken döletler teshkilati balilar fondi jemiyitining pakistandiki wekili abdullah fazil bayanat élan qilip, penjab ölkiside körülgen hawa bulghinishining tesirige uchrighan 5 yashtin kichik 11 milyon bala we bashqilarni qoghdash üchün, pakistan hökümitini hawa bulghinishini azaytish meqsitide jiddiy tedbir qollinish hem téximu köp tirishchanliq körsitishke chaqirdi.
fazil hawa bulghinishining 11 milyon balining salametlikige tehdit séliwatqanliqi toghruluq agahlandurush bérip mundaq dédi:
«hawa bulghinishi ene shundaq yuqiri sewiyege yétishtin burun, pakistanda 5 yashtin kichik bala ölümlirining texminen %12 i hawa bulghinishidin kélip chiqqanidi.»
pakistan hökümiti dölet boyiche nopusi eng köp penjab ölkisining bezi sheherliride hawa bulghinishi adettin tashqiri derijide yuqiri sewiyege yetkenliktin, baghcha, haywanatlar baghchisi, muzéy we tarixiy jaylarni 17-noyabrghiche taqiwetkenidi.
igilinishiche, penjab ölkilik hökümet puqralarning maska taqishini mejburiy qilghan bolsimu, emma köpinche kishiler buninggha emel qilmighan. shunga, penjab ölkilik hökümet hawa bulghinishigha qarshi küresh mesiliside süniy yamghur yaghdurush usulini tetqiq qilmaqta iken.
