nato rusiye we shimaliy koréyening ukraina mesilisidiki qararini qattiq eyiblidi

türkiye awazi radiyosi xewiri: shimaliy atlantik ehdi teshkilati bayanat élan qilip,  rusiye we shimaliy koréyening ukraina mesilisidiki qararini qattiq eyiblidi.

bayanatta mundaq déyildi:

«shimaliy koréyening milyonlighan oq-dora we ballistik bashqurulidighan bomba bilen teminlesh arqiliq rusiyening urush heriketlirige hazir bériwatqan zor yardimige qoshumche qilip, minglighan jengchi qisimlirini ewetishi, rusiyening ukrainadiki urushqa bolghan qollishini téximu xeterlik derijide kéngeytmekte.

rusiye bilen shimaliy koréye otturisidiki barghanséri chongqurlishiwatqan herbiy hemkarliq hem yawropa-atlantik rayonining hem asiya-tinch okyan rayonining bixeterlikige éghir tesir körsetmekte. derweqe bu hemkarliq birleshken döletler teshkilati xewpsizlik kéngishining qararini depsende qilghanliqtur.

rusiyening birleshken döletler teshkilati xewpsizlik kéngishining daimiy ezaliq salahiyiti nezerde tutulghanda, bu nahayiti éghir ehwaldur. rusiyeni bu qararlargha riaye qilishqa we xelqaraliq mejburiyetlirini ada qilishqa qaytishqa chaqirimiz.

rusiyening 26-séntebir küni shimaliy koréyening yadro qorallirini cheklesh <küntertiptin chiqiriwétildi> dégen bayanatini qetiy qobul qilghili bolmaydu. bu dunyawi yadro qorallirini cheklesh sistémisini ajizlashturupla qalmay, birleshken döletler teshkilati xewpsizlik kéngishining  munasiwetlik qararlirigha ochuq-ashkara xilaptur. bu qilmish rayondiki jiddiychilikni téximu kücheytiwétidu.

barliq döletlerni rusiyening tajawuzchiliq herikitige qetiy yardem bermeslikke chaqirimiz, rusiyening ukrainagha qarshi élip bériwatqan qanunsiz urushini qollap-quwwetlesh we uzartishqa türtke bolidighan herqandaq terepni eyibleymiz.

taki axirqi ghelibini qolgha keltürgenge qeder ukrainani herdaim her jehettin qollap-quwwetlesh iradimiz  qetiydur.»