مېكسىكادا بىر يۈك ماشىنىسىدىن 11 جەسەت تېپىلدى
مېكسىكانىڭ جەنۇبىدىكى گۇئېررېرو ئۆلكىسىدە تاشلىۋېتىلگەن بىر يۈك ماشىنىسىنىڭ كوزۇپىدىن ئىككىسى بالىنىڭ بولۇپ 11 كىشىنىڭ جەسىتى تېپىلدى.
2208214
تۈركىيە ئاۋازى رادىيوسى خەۋىرى: مېكسىكا تاراتقۇلىرىنىڭ خەۋەر قىلىشىچە، ساقچىلار گۇئېررېرو ئۆلكىسىنىڭ چىلپانسىنگو شەھىرىدىكى دېل سول تاشيولىدا بىر يۈك ماشىنىسىنىڭ تاشلىۋېتىلگەنلىكى توغرىسىدا ئۇچۇر تاپشۇرۇۋالغان.
ساقچىلار بۇ ئۇچۇرغا ئاساسەن دەرھال شۇ جايغا يېتىپ بېرىپ، ماشىنىنىڭ كوزۇپىدىن ئىككىسى بالىنىڭ بولۇپ، 11 كىشىنىڭ جەسىتىنى تاپقان.
مېكسىكا دۆلەت بىخەتەرلىك تارماقلىرىنىڭ بىلدۈرۈشىچە، «لوس ئاردىللوس» ناملىق تەشكىللىك جىنايەت گۇرۇھىنىڭ بۇ قىرغىنچىلىقنىڭ جاۋابكارى بولۇش ئېھتىماللىقى يۇقىرى ئىكەن.
