پاكىستاندا يۈز بەرگەن تېررورلۇق ھۇجۇمىدا نۇرغۇن ئادەم ئۆلدى
پاكىستاندا يۈز بەرگەن ئايرىم - ئايرىم ئىككى قېتىملىق تېررورلۇق ھۇجۇمىدا 4 ساقچى بىلەن 2 بالا ھاياتىدىن ئايرىلدى، 5 ساقچى يارىلاندى.
2207858
تۈركىيە ئاۋازى رادىيوسى خەۋىرى: پاكىستان ساقچى دائىرىلىرىنىڭ بىلدۈرۈشىچە، تۈنۈگۈن جەنۇبىي ۋەزىرىستان رايونىدا دۆلەت خەۋپسىزلىك كۈچلىرى ئولتۇرغان بىر ئاپتوموبىل ئۆتۈپ كېتىۋاتقاندا يول چېتىگە ئورۇنلاتۇرۇپ قويۇلغان بومبا پارتلىغان.
پارتلاشتا 4 ساقچى جېنىدىن ئايرىلغان، 5 ساقچى يارىلانغان.
ھۇجۇمنىڭ جاۋابكارلىقىنى تېخى ھېچكىم ئۈستىگە ئالمىغان بولسىمۇ، ئەمما يېقىنقى مەزگىللەردە پاكىستان تالىبانلىرىنىڭ بۇ رايوندا ھۇجۇملىرىنى كۈچەيتكەنلىكى مەلۇم.
شۇنىڭ بىلەن بىر ۋاقىتتا، پاكىستان تالىبان تەشكىلاتى خەيبەر پاختۇنخۋا ئۆلكىسىدىكى تىراھ ۋادىسى يېقىنىغا ئاتقان توپ ئوقى يول بويىغا چۈشكەن.
ھۇجۇم يۈز بەرگەن ۋاقىتتا پىيادە مېڭىپ مەكتەپكە كېتىۋاتقان ئىككى ئوقۇغۇچى ھاياتىدىن ئايرىلغان.
