ghezzediki waksina emlesh seperwerliki minglarche baligha waksina emlenmeyla axirlashti

türkiye awazi radiyosi xewiri: birleshken döletler teshkilati (b d t) yazma bayanat élan qilip, ghezzening shimalida pelestin sehiye ministirliqi, dunya sehiye teshkilati, b d t ning yéqin sherqtiki pelestinlik musapirlargha yardem bérish we qurulush qilish agéntliqi, b d t balilar yardem fondi qatarliqlarning hemkarliqida yolgha qoyulghan <10 yashtin töwen balilargha palechlik késilining aldini élish waksinsi emlesh paaliyiti>ning ikkinchi basquchining tünügün axirlashqanlqini, paaliyet jeryanida 94 ming baligha waksina emlengen bolsimu, yenila minglighan balilargha yétishmigenlikini uqturdi.

ghezzede bir yildin buyan dawamlishiwatqan urush, heptilerche dawamlashqan qorshaw we israiliyening toxtimay élan qiliwatqan mejburiy köchürüsh telepliri hem bombardimanliri, emleshni éghir derijide kéchiktürdi we tosqunluqqa uchratti.

dunya sehiye teshkilatining pelestindiki wekili rik pépérkorn, ghezzening shimalidiki barliq balilargha ikkinchi we axirqi basquchluq waksina emleshning nishan qilinghanliqini bildürdi.

dunya sehiye teshkilati bash diréktori tédros adhanom gébréyus 1-noyabir küni ijtimaiy taratqu supisi «X» tiki adrésida bayanat élan qilip: «ghezzening shimalida 23-öktebirde kéchiktürülgen palechlik késilining aldini élish waksinisi emlesh paaliyiti ete (2-noyabir) qayta bashlinishqa teyyar» dégenidi.

dunya sehiye teshkilatining ijtimaiy taratqudiki adrésida 23-öktebir küni bayanat élan qilip: «küchiyiwatqan zorawanliq, keng kölemlik bombardiman, köp sandiki köchürüsh buyruqliri we kapaletke ige qilinghan insanperwerlik yardem ariliqining bolmasliqi sewebidin pelestin sehiye ministirliqi, dunya sehiye teshkilati, b d t balilar yardem fondi we b d t ning yéqin sherqtiki pelestinlik musapirlargha yardem bérish we qurulush qilish agéntliqi ghezzening shimalidiki palech késili waksinisi emlesh paaliyitini kéchiktürüshke mejbur boldi» dégenlerni qeyt qilghanidi.