ھىزبۇللاھ ئىسرائىلىيەنىڭ 4 ھەربىي بازىسىغا ھۇجۇم قىلدى
ھىزبۇللاھ ئىسرائىلىيەنىڭ شىمالىدىكى 4 ھەربىي بازىغا ۋە پەلەستىنلىكلەردىن تارتىۋېلىنغان يەرلەرنىڭ ئۈستىگە قۇرۇلغان 14 ئولتۇراق رايونغا ھۇجۇم قىلغانلىقىنى، ھۇجۇمدا ئىسرائىلىيە ئەسكەرلىرىدىن ئۆلگەن ۋە يارىلانغانلارنىڭ بارلىقىنى ئېلان قىلدى.
تۈركىيە ئاۋازى رادىيوسى خەۋىرى: ھىزبۇللاھنىڭ تېلېگرام ئادرېسىدا ئېلان قىلىنغان باياناتتا، ئىسرائىلىيەنىڭ شىمالىغا قىلىنغان ھۇجۇملار ھەققىدە مەلۇمات بېرىلدى.
باياناتتا، ئىسرائىلىيەنىڭ شىمالىدىكى 4 ھەربىي بازىسىغا ھۇجۇم قىلىنغانلىقى ۋە بۇ دائىرىدە ئىسرائىلىيە ھاۋا ئارمىيەسىگە قاراشلىق تېخنىكلار تەربىيەلىنىدىغان ھايفا تېخنىكا بازىسىنىڭ تۇنجى قېتىم بومباردىمان قىلىنغانلىقى ئۇقتۇرۇلدى.
ھىزبۇللاھ ھايفا شەھىرىنىڭ جەنۇبىدىكى شىمالىي رايون قوماندانلىقىغا قاراشلىق ئېلياكىن بازىسىغا ئۇچقۇسىز ئايروپىلانلار بىلەن ھۇجۇم قىلىنغانلىقىنى ۋە دەل نىشانغا زەربە بەرگەنلىكلىرىنى بىلدۈردى.
نېتانيا شەھىرىنىڭ شەرقىگە جايلاشقان مەركىزىي رايون قوماندانلىقىغا قاراشلىق بېيت لىد ھەربىي بازىسى ۋە ھايفا يېقىنىدىكى زېۋۇلۇن ھەربىي بازىسىغىمۇ باشقۇرۇلىدىغان بومبىلار بىلەن زەربە بېرىلگەنلىكى قەيت قىلىندى.
باياناتتا يەنە، پەلەستىنلىكلەردىن تارتىۋېلىنغان يەرلەر ئۈستىگە قۇرۇلغان 14 ئولتۇراق رايون ۋە ئەتراپىدىكى ھەربىي نۇقتىلارغىمۇ ھۇجۇم قىلىنغانلىقى، بۇ ھۇجۇملاردا ئىسرائىلىيە ئەسكەرلىرىدىن ئۆلگەن ۋە يارىلانغانلارنىڭ بارلىقى ئەسكەرتىلدى.
