israiliye liwangha 11 ming 876 qétim hawa hujumi qildi

türkiye awazi radiyosi xewiri: liwan resmiy xewer agéntliqi <NNA> ning xewiride, liwan muhit asrash ministirliqining israiliyening hujumliri we dölettiki weziyet heqqide doklat élan qilghanliqi bildürüldi.

doklatta israiliye armiyesining mushu 24 saet ichide liwanning jenubiy we sherqiy rayonlirigha 109 qétim hawa hujumi qilghanliqi, shuning bilen israiliyening 2023-yili 8-öktebirdin buyan qilghan hawa hujumliri sanining 11 ming 876 qétimgha yetkenliki bildürüldi.

israiliye armiyesining hujumliri sewebidin yurt-makanidin ayrilghanlar üchün 1133 panahlinish merkizi qurulghanliqi we bu merkezlerge hazirghiche 190 ming 83 kishining orunlashturulghanliqi eskertildi.

doklatta yene, israiliyening bombardimani sewebidin köchmenler dolqunining dawamlishiwatqanliqi, liwan bixeterlik bashqarmisining melumatlirigha asaslanghanda, 23-séntebirdin 2-noyabirghiche liwandin suriyege 539  ming 164 kishining ötkenliki, bulardin 361 ming 300 kishining suriyelik,  177 ming 864 kishining liwan puqrasi ikenliki uqturuldi.

  doklatta yene, israiliyening 2023-yili 8-öktebirdin buyan liwangha qilghan hujumlirida 2968 kishi ölüp, 13 ming 319 kishining yarilanghanliqi eskertildi.

buningdin bashqa yene, liwan bash ministiri nejib miqati bir liwan puqrasining döletning shimaligha déngiz arqiliq esker chiqirip tutqun qilinghanliqigha munasiwetlik tashqi ishlar ministiri abdullah buhebibke, birleshken döletler teshkilati xewsizlik kéngishige erz sunush buyruqi berdi.

bash ministirliq ishxanisining yazma bayanatida, miqatining shimal wilayitige qarashliq betrun nahiyiside imad emhez isimlik liwan puqrasining tutup kétilish weqesi heqqide melumat élish üchün liwan armiye bash qomandani joséf awn we birleshken döletler teshkilati liwan waqitliq tinchliq saqlash küchliri (UNIFIL) qomandanliri bilen körüshkenliki bildürüldi.

birleshken döletler teshkilati liwan waqitliq tinchliq saqlash küchliri (UNIFIL)  qomandanliri miqatigha weqe heqqide kéreklik tekshürüshlerni élip bériliwatqanliqi we armiye bilen maslishish ornitilghanliqi heqqide melumat berdi.

miqati weqening tekshürülüshini tézlitishning zörürlükini tekitlep, tashqi ishlar ministiri buhebibtin bu ish heqqide birleshken döletler teshkilati xewpsizlik kéngishige jiddiy erz sunushni telep qildi.