نىگېردا فىرانسىيەنىڭ مۇستەملىكە دەۋرىدىن قالغان كوچىلارنىڭ ئىسمى ئۆزگەرتىلدى

تۈركىيە ئاۋازى رادىيوسى خەۋىرى: نىگېر ياشلار ۋە مەدەنىيەت مىنىستىرلىقى قارار ماقۇللاپ، پايتەخت نىئامېيدىكى نۇرغۇن كوچا ۋە مەيدانلارنىڭ ئىسمىنى ئۆزگەرتتى.

نىگېر ياشلار ۋە مەدەنىيەت مىنىستىرى ئامادو ئابدۇراخمان بايانات ئېلان قىلىپ مۇنداق دېدى:

 «پايتەخت نىئامېينى ئۆز ئىچىگە ئالغان نۇرغۇن شەھەرلەردىكى كوچىلار، مەيدانلار ۋە چوڭ يوللارغا، نىگېر خەلقىگە فىرانسىيەنىڭ مۇستەملىكە دەۋرىدىكى ئازاب-ئوقۇبەت ۋە ئەزىيەتلەرنى ئەسلىتىدىغان ئىسىملار قويۇلغان.

شۇڭا، فىرانسىيەنىڭ سابىق پىرېزىدېنتلىرىدىن <چارلېز دېگول> نىڭ ئىسمى قويۇلغان چوڭ يولنىڭ ئىسمى نىگېرنىڭ مۇستەقىللىقىدا مۇھىم رول ئوينىغان شەخسلەردىن بىرى بولغان <جىبو باكارى> غا ئۆزگەرتىدى.

يەنە نىئامېيدا فىرانسىيەلىك قوماندان پارفايت-لۇئىس مونتېلنىڭ تاشتىن ياسالغان تامغا ئويۇلغان سۈرىتى ئېلىۋېتىلىپ، ئورنىغا بۇركىنا فاسونىڭ مەشھۇر رەھبىرى توماس سانكارانىڭ سۈرىتى ئويۇلدى.

<فىرانكوفونى مەيدانى> نىڭ ئىسمىمۇ بۇركىنا فاسو، نىگېر ۋە مالى تەرىپىدىن ياسالغان <ساھېل دۆلەتلىرى ئىتتىپاق مەيدانى> غا ئۆزگەرتىلدى.»

نىگېردا  1961-يىلى فىرانسىيەلىك كومپوزىتور ماۋرىس ئالبېرت تىرىئېت يازغان «La Nigerienne» نىڭ ئورنىغا، 2023-يىلى 6-ئايدا بۇ دۆلەتنىڭ مۇستەملىكىچىلىككە قارشى كۈرىشى ئەكس ئەتتۈرۈلگەن  «ۋەتەننىڭ شەرىپى ئۈچۈن» ناملىق دۆلەت شېئىرى ئوقۇلۇشقا باشلانغانىدى.