iran bash elchisining öchini élish hoquqini saqlap qalidighanliqini bildürdi

türkiye awazi radiyosi xewiri: iranning birleshken döletler teshkilati (b d t) diki daimiy wekili emir seid irawanining liwandiki weqeler heqqide b d t bash katipi antoniyo gutérrésqa yollighan mektupi jamaetchilikke ashkarilandi.

iranning «qaraqchi israiliye tüzümi»ning liwandiki «buzghunchiliq we térrorluq» paaliyetlirini eng qattiq shekilde eyibligenliki bildürülgen mektupta, israiliyening mezkur heriketlirining xelqara qanunni depsende qilip, tinchliq we bixeterlikke tehdit salghanliqi bayan qilindi.

mektupta, bolupmu amérika qoshma ishtatliri bashchiliqidiki «israiliye tüzümi»ni qollap-quwwetligen gherb döletlirining tél awiwning xataliqliriningmu jawabkari  ikenliki tekitlendi.

«iran, liwandiki bash elchisining yarilinishigha seweb bolghan hujumgha xelqara qanun boyiche tégishlik jawab qayturush hoquqini saqlap qalidu» déyilgen mektupta, b d t bash katipi we b d t xewpsizlik kéngishi israiliyening térrorluq paaliyitini eyibleshke chaqirildi.

b d t xewpsizlik kéngishining israiliyening rayondiki paaliyetlirinimu qattiq eyiblishi kérekliki otturigha qoyulghan mektupta,  xewpsizlik kéngishidin «térrorchi tüzüm»ge qarshi zörür qedemlerni tashlash telep qilindi.

liwanda 17-séntebir hizbullah ezaliri ishlitiwatqan chaqirghu üsküniliri partlap ikkisi bala bolup jemiy 12 kishi qaza qilghan, texminen 3 ming kishi yarilanghanidi.

dölette tünügünmu simsiz chaqirghu apparatliri partlitilip, 20 kishi hayatidin ayrilghanidi.