gutérrés: xelqara jemiyet pelestin üchün yéterlik tirishchanliq körsetmidi

türkiye awazi radiyosi xewiri: b d t bash katipi antoniyo gutérrés niyuyorkta ötküzgen muxbirlarni kütüwélish yighini ötküzdi. u yighinda xelqara jemiyetke murajiet qilip, ghezzediki urushni mumkin bolghan eng qisqa waqit ichide axirlashturush üchün, tereplerge téximu köp bésim ishlitishni telep qildi.

ghezzege qaritilghan hujumlarda b d t xadimlirining öltürülüshi mesilsii toghrisidimu toxtalghan gutérrés, insaniy yardem xizmetchilirining qoghdilishi kéreklikini tekitlidi.

insaniy yardem xizmetchilirige qaritilghan hujumlarning jiddiy tekshürülüshi we jinayetchilerning jawabkarliqining sürüshte qilinishi kéreklikini؛ bu telepning hemme yer üchün, emma bolupmu ghezze üchün téximu küchke ige ikenlikini bildürgen gutérrés, ghezzede öltürülgen insaniy yardem xizmetchilirining sanining misli körülmigen derijide köp ikenlikini qeyt qildi.

b d t bash katipi gutérrés yene, xelqara jemiyetning jawabkarlarning jinayi jawabkarliqini sürüshte qilish mesiliside téximu qetiylik bilen meydanini namayan qilishi kéreklikini otturigha qoydi.

gutérrés urush toxtitish emelge ashurulghandin kéyin pelestin hökümitining ghezze, gherbiy qirghaq we sherqiy quddusta hoquqni qoligha élishi we ikki döletlik hel qilish charisini emelge ashuridighan sharaitlarning yaritilishini qollaydighanliqini bildürdi.

b d t bash katipi yene: «pelestin döliti özining qaide-tüzümliri we asasiy qanunigha asasen bashqurulushi kérek» dégenlerni sözlirige ilawe qildi.