gutérrés: israiliyening hujumlirida 6 b d t xadimi öldi
birleshken döletler teshkilati bash katipi antonyo gutérrés israiliye armiyesining ghezze rayonining ottura qismidiki nusayrat musapirlar lagérigha qilghan hujumida b d t ning 6 xadimining ölgenlikini bildürdi.
türkiye awazi radiyosi xewiri: birleshken döletler teshkilati bash katipi antonyo gutérrés israiliye armiyesining ghezze rayonining ottura qismidiki nusayrat musapirlar lagérida öy – makanliridin ayrilip qalghanlar panahliniwatqan birleshken döletler teshkilati yéqin sherqtiki pelestin musapirlirigha yardem bérish – xizmet ishlesh orgini (UNRWA) mektipige qilghan hujumida b d t ning 6 xadimining hayatidin ayrilghanliqini bildürdi.
gutérrés ammiwi ortaqlishish tor béti X sehipiside, bu heqte élan qilghan bayanatida, mundaq dédi:
«ghezzede yüz bergen ishlarni qetiy qobul qilghili bolmaydu. israiliye bügün yene panah jaygha aylandurulghan we texminen 12 ming kishi panahliniwatqan birleshken döletler teshkilati yéqin sherqtiki pelestin musapirlirigha yardem bérish – xizmet ishlesh orgini (UNRWA)) gha tewe bir mektepni bombardiman qildi. hujum netijiside b d t ning 6 xadimi hayatidin ayrildi.»
«xelqara insanperwerlik qanunigha xilap bundaq wehshiy qilmishlargha derhal xatime bérilishi kérek.»
ghezze rayonidiki xelq mudapiesi bashqarmisining bayanatida, elkewni mektipige qilinghan hujumda qaza qilghanlarning ichide ayallar we balilarningmu barliqi, hujum netijiside 18 kishining hayatidin ayrilghanliqi, 18 kishining yarilanghanliqi eskertilgenidi.
