borrél: kéchisi yardem bérip, etisi ularni öltürüsh chare emes

türkiye awazi radiyosi xewiri: josép borrél misir ziyariti dairiside tunji qétim barghan refah chégra éghizida bayanat élan qilip, 1400 yük mashinisining rayongha (ghezzege) kirishini kütüp turuwatqanliqini, eng yaxshi éhtimalgha asaslanghanda 50 yük mashinisining ghezzege kireligenlikini, buning ghezzediki éhtiyajqa nisbeten «okyandin bir tamche» ikenlikini tekitlidi we sözini dawamlashturup: «yawropa ittipaqi pelestinliklerni siyasiy hel qilish charisi tépishimiz kéreklikini tonup yetken halda qollashni dawamlashturidu. chünki bügün kéche birige yémeklik bérip, etisi ularni öltürüsh hel qilish charisi emes» dédi.

u yawropa ittipaqi we uninggha eza döletlerning urush toxtitish we esirlerni qoyup bérish chaqiriqi élan qilghanliqini, söhbetlerning téz ilgirilimeywatqanliqini otturigha qoydi.

borrél yawropa ittipaqining weziyetni özgertish üchün némilerni qilalaydighanliqi toghrisidiki bir soalgha jawab bérip: «biz israiliye dairilirige siyasiy we diplomatik bésim ishlitelishimiz mumkin, emma bizning iqtidarimiz cheklik. biz pütün küchimiz bilen tirishiwatimiz, amérikamu pütün küchi bilen tirishiwatidu. emma bu yerde bir nersiler tetürige méngiwatidu. men urush toxtitishning némishqa emelge ashmighanliqini chüshenmeywatimen. (buni) biriliri kéchiktürüwatidu» dédi.

borrél yene: «biz yene némilerni qilalaymiz? iqtidarimizni ishlitishtin bashqa néme ishlarni qilalaymiz? elwette biz téximu köp ishlarni qilalaymiz, emma men téximu köp ishlarni qilidighan siyasiy irade bar dep qarimaymen» dégenlerni sözlirige ilawe qildi.