hamas bügünki söhbetke qatnashmaydu
hamas siyasiy biyurosining ezasi suheyl elhindi qatarning paytexti dohada bügün qayta bashlinishi kütülüwatqan urush toxtitish söhbitige qatnashmaydighanliqlirini éytti.
türkiye awazi radiyosi xewiri: suheyl elhindi bu heqte élan qilghan bayanatida, mundaq dédi:
«hamas doha yaki qahirede qayta bashlinishi kütülüwatqan söhbetlerge qetiy qatnashmaydu.»
«hamas 2 – iyul küni muressechilerdin (amérika qoshma ishtatliri pirézidénti jo baydinning qarishi we birleshken döletler teshkilati xewpsizlik kéngishining qararigha asasen) birdeklik hasil qilinghan mesililerge dair yolgha qoyush pilanini otturigha qoyushini, hemde israiliyening bu pilanda ching turidighanliqini éniq wede qilishini telep qilidu. eger bu shertler hazirlansa, kélishimni yolgha qoyush mixanizmigha daxil bolushqa teyyarmiz.»
amérika qoshma ishtatliri pirézidénti jo baydin 5-ayning 31-küni 3 basquchluq urush toxtitish pilanini élan qilghanidi. bu pilan uzun muddetlik urush toxtitish, israiliyening ghezzedin pütünley chékinishi, özara esir we tutqun almashturush, öy – makanliridn ayrilip qalghan pelestinliklerning ghezzege qaytishigha kapaletlik qilish, insanperwerlik yardem buyumlirining üzlüksiz we yéterlik derijide yetküzüp bérilishi, ghezzeni qayta qurush qatarliqlarni öz ichige alatti.
israiliye bash ministiri bényamin nétanyahu kéyin esir almashturush söhbitige munasiwetlik yéngi shertlerni otturigha qoyghan, shuning bilen, bu pilan toxtap qalghanidi.
igilinishiche, bügün dohada qayta bashlinishi kütülüwatqan söhbetke, qatar bash ministiri, qoshumche tashqi ishlar ministiri sheyx muhemmed bin abdurrahman alsani, amérika merkiziy axbarat idarisining bashliqi wilyam burns, misir axbarat idarisining bashliqi abbas kamil we mossad dériktori (israiliye axbarat idarisining bashliqi) dawid barnéya qatarliqlar qatnishidiken.
