baydin ghezzede urush toxtitishning hazirmu mumkinlikini éytti

türkiye awazi radiyosi xewiri: pirézidént baydin CBS qanilining ziyaritini qobul qilghanda, ghezzediki urush toxtitishqa munasiwetlik mesililer toghrisidimu toxtaldi.

riyasetchining «sizning pirézidéntliq mudditingiz toshushtin burun ghezzede urush toxtitish mumkinchiliki barmu-yoq?» dégen soaligha baydin: «shundaq, bu hélihem mumkin» dep jawab berdi.

«birleshken döletler teshkilati xewpsizlik kéngishi qollighan urush toxtitish pilanini hazirmu tetbiqlashqa bolidu» dégen baydin, weziyetning «rayon xaraktérlik bir urushqa aylinip kétishi»ning aldini élish tirishchanliqlirining dawamlishiwatqanliqini bildürdi.

u 5-ayning 31-küni israiliyening teklipi ikenlikini tekitligen 3 basquchluq urush toxtitish pilanini élan qilghanidi؛ qisqiche qilip éytqanda, pilan menggülük urush toxtitish, israiliyening ghezzedin chékinip chiqishi, esirler bilen tutqun qilinghanlarni özara qoyup bérish, sergerdan pelestinliklerni ghezzege qaytishi, ghezzeliklerni insanperwerlik yardemliri bilen üzlüksiz shundaqla yéterlik derijide teminlesh we ghezzeni qayta qurush qatarliqlarni öz ichige alatti.

nétanyahu kéyin esirlerni almashturush söhbetlirige «qoralliq pelestinliklerning jenubtin shimalgha qaytip kélishining aldini élish we israiliye armiyesining ghezze bilen misir chégrasidiki filadélfiye karidorida turushini kapaletke ige qilish» qatarliq yéngi shertlerni otturigha qoydi.

amérika, misir we qatar 8-awghust birleshme bayanat élan qilip, israiliye we hamasni 15-awghust qahire yaki dohada ghezzede urush toxtitish we esir almashturush toghrisidiki söhbetlerni qayta bashlashqa chaqirghanidi.