israiliye maliye ministiri smotrich amérikaning urush toxtitish chaqiriqigha naraziliq bildürdi
israiliyening ongchil maliye ministiri bézalél smotrich amérikaning urush toxtitish chaqiriqigha pisent qilmastin, «tashqi bésimgha bash egmeydighanliqini we pütün küchi bilen teslim bolush kélishimige qarshi turidighanliqini» bildürdi.
türkiye awazi radiyosi xewiri: smotrich ijtimaiy taratqu hésabida amérika, misir we qatarning «ghezzede urush toxtitishni tézdin ishqa ashurush kérek» dégen chaqiriqigha naraziliqini tekrarlidi.
smotirich amérikaning pozitsiyesige we rayon xaraktérliq tehditlerdin israiliyeni qoghdighanliqigha hörmet qilidighanliqini bildürüp, «amérikaningmu israiliyening démokratiyesige we saylanghan emeldarlirining bixeterlik qararlirigha hörmet qilishini kütidighanliqini» bildürdi.
smotrich «amérika elqaidege teslim bolmighandek, israiliyemu özining bixeterlikige ziyan yetküzidighan tashqi bésimgha bash egmeydu» dédi.
amérika, misir we qatarning «ghezzede urush toxtitish» chaqiriqini «hamasqa teslim bolush kélishimi» dep teripligen smotrich, israiliyening bixeterlikige ziyan yetküzidighan kélishimge pütün küchi bilen qarshi turidighanliqini éytti.
aqsaray dölet bixeterliki alaqe meslihetchisi jon kirbi urush toxtitish chaqiriqigha qarshi turghan smotrichqa qarita: «smotrichqa oxshash bir qisim öktichiler bu kélishimning hamasqa teslim bolghanliq bolidighanliqini yaki esirlerni mehbuslar bilen almashturmasliq kéreklikini ilgiri sürüshmekte. bular reswachiliq, xata we bimene» dep baha berdi.
