ئىسرائىلىيە مالىيە مىنىستىرى سموترىچ ئامېرىكانىڭ ئۇرۇش توختىتىش چاقىرىقىغا نارازىلىق بىلدۈردى

تۈركىيە ئاۋازى رادىيوسى خەۋىرى: سموترىچ ئىجتىمائىي تاراتقۇ ھېسابىدا ئامېرىكا، مىسىر ۋە قاتارنىڭ «غەززەدە ئۇرۇش توختىتىشنى تېزدىن ئىشقا ئاشۇرۇش كېرەك» دېگەن چاقىرىقىغا نارازىلىقىنى تەكرارلىدى.

سموتىرىچ ئامېرىكانىڭ پوزىتسىيەسىگە ۋە رايون خاراكتېرلىق تەھدىتلەردىن ئىسرائىلىيەنى قوغدىغانلىقىغا ھۆرمەت قىلىدىغانلىقىنى بىلدۈرۈپ، «ئامېرىكانىڭمۇ ئىسرائىلىيەنىڭ دېموكراتىيەسىگە ۋە سايلانغان ئەمەلدارلىرىنىڭ بىخەتەرلىك قارارلىرىغا ھۆرمەت قىلىشىنى كۈتىدىغانلىقىنى» بىلدۈردى.

سموترىچ «ئامېرىكا ئەلقائىدەگە تەسلىم بولمىغاندەك، ئىسرائىلىيەمۇ ئۆزىنىڭ بىخەتەرلىكىگە زىيان يەتكۈزىدىغان تاشقى بېسىمغا باش ئەگمەيدۇ» دېدى.

ئامېرىكا، مىسىر ۋە قاتارنىڭ «غەززەدە ئۇرۇش توختىتىش» چاقىرىقىنى «ھاماسقا تەسلىم بولۇش كېلىشىمى» دەپ تەرىپلىگەن سموترىچ، ئىسرائىلىيەنىڭ بىخەتەرلىكىگە زىيان يەتكۈزىدىغان كېلىشىمگە پۈتۈن كۈچى بىلەن قارشى تۇرىدىغانلىقىنى ئېيتتى.

ئاقساراي دۆلەت بىخەتەرلىكى ئالاقە مەسلىھەتچىسى جون كىربى ئۇرۇش توختىتىش چاقىرىقىغا قارشى تۇرغان سموترىچقا قارىتا: «سموترىچقا ئوخشاش بىر قىسىم ئۆكتىچىلەر بۇ كېلىشىمنىڭ ھاماسقا تەسلىم بولغانلىق بولىدىغانلىقىنى ياكى ئەسىرلەرنى مەھبۇسلار بىلەن ئالماشتۇرماسلىق كېرەكلىكىنى ئىلگىرى سۈرۈشمەكتە. بۇلار رەسۋاچىلىق، خاتا ۋە بىمەنە» دەپ باھا بەردى.