amérika israiliye qisimlirigha dawamliq yardem béridu
amérika qoshma ishtatliri ishghaliyet astidiki iyordan deryasining gherbiy qirghiqida kishilik heq – hoquqni éghir derijide depsende qilghan israiliye qisimlirigha dawamliq yardem béridighanliqini jakarlidi.
türkiye awazi radiyosi xewiri: amérika qoshma ishtatliri tashqi ishlar ministirliqi bayanatchisi mattéw millér, yazma bayanatida, kishilik hoquqni depsende qilghanliqi seweblik, amérika qanunigha asasen herbiy yardemge érishelmeydighan chet el herbiy qisimliri heqqide toxtaldi.
u, israiliye armiyeside kishilik hoquqni depsende qilghan qisimlarningmu barliqini, emma bu qisimlarning bu qilmishlirini tézdin tüzetkenlikini bayan qilip mundaq dédi:
«tashqi ishlar ministirliqi israiliye armiyeside kishilik hoquqni éghir depsende qilghan ikki qisim we ikki puqrawi organgha chétishliq weqelerni yéqindin tekshürdi, tekshürüsh netijiside, ularning kishilik hoquqni depsende qilish qilmishlirini tézdin tüzetkenlikini éniqlap chiqti. «Leahy qanuni» basquchigha asasen, bu qisimlar we organlar amérika qoshma ishtatlirining dawamliq bixeterlik yardimige érishidu.»
amérika qoshma ishtatlirida 1997-yili maqullanghan, tüzgüchisining nami bérilip, «Leahy qanuni» dep atalghan bu qanun, kishilik hoquq depsendichiliklirige chétishliqi bar chet el qisimlirining amérika qoshma ishtatlirining herbiy yardimige érishishining aldini alidu.
amérika qoshma ishtatliri tashqi ishlar ministirliqi ishghaliyet astidiki iyordan deryasining gherbiy qirghiqida kishilik hoquqni éghir depsende qilghan «nétzah yehuda» qismini tekshürüshke bashlighan we yéqinda bu tekshürüshni tamamlighanidi.
amérika taratqulirining ismini ashkarilashni xalimighan bir qisim emeldarlarni menbe körsitip élan qilghan xewerliride, tekshürüsh netijiside aqlanghan qisim, qanungha xilapliq qilghan bashqa herbiy qisim we puqrawi organlargha qarita émbargo yürgüzüshning hajiti yoqluqi ilgiri sürülgenidi.
