seudi erebistan heniyye suyiqesti heqqide bayanat élan qildi

türkiye awazi radiyosi xewiri: seudi erebistan pelestin islamiy qarshiliq körsitish herikiti — hamas siyasiy biyurosi reisi ismail heniyyening téhran ziyariti jeryanida qestlep öltürülüshining iranning igilik hoquqini ochuq-ashkara depsende qilish ikenlikini we bu weqening rayonning tinchliqi hemde bixeterlikige tehdit peyda qilghanliqini bildürdi.

seudi erebistan muawin tashqi ishlar ministiri welid el hureyji islam hemkarliq teshkilatining israiliyening pelestin xelqige qaratqan hujumliri we iranning igilik hoquqining depsende qilinishi qatarliq mesililerni muzakire qilish meqsitide seudi erebistanning jidde shehiride chaqirilghan yighinida söz qilip, riyad hökümitining israiliyening pelestin ichi-sirtidiki pelestin xelqige qiliwatqan ochuq-ashkara hujumliri we qanunsiz qilmishliri sewebidin pelestin zéminidiki weqelerning künséri éghirlishiwatqanliqidin waqip ikenlikini tekitlidi.

seudi erebistanning muawin tashqi ishlar ministiri hureyji hamas rehbiri heniyyening téhran ziyariti jeryanida öltürülüshining iranning igilik hoquqi, zémin pütünlüki, dölet bixeterliki hemde xelqara qanunning ochuq-ashkara depsende qilinishi ikenlikini shundaqla uning rayonning tinchliqi we bixeterlikige tehdit salghanliqini qeyt qildi.

u yene, seudi erebistanning pelestin mesilisige tutup kelgen qetiy meydanini asas qilip, israiliye armiyesining puqralargha qaratqan hujumlirini eyibleydighanliqiniwe her qandaq döletning igilik hoquqigha qilinghan her qandaq hujum yaki her qandaq döletning ichki ishlirigha arilishishni ret qilidighanliqini tekitlidi.

hamas siyasiy biyurosi reisi ismail heniyye 31-iyul iranning paytexti téhranda suyiqetke uchrap shéhit bolghanidi.