pezeshkiyan israiliyening jawabsiz qalmaydighan éghir xataliq ötküzgenlikini éytti

türkiye awazi radiyosi xewiri: iran dölet téléwiziyesining xewirige qarighanda, pirézidént pezeshkiyan paytext téhranda ziyarette bolghan iyordaniye tashqi ishlar ministiri eymen sefedini qobul qilghan.

söhbet jeryanida, iranning resmiy méhmini bolghan hamas siyasiy biyurosi bashliqi heniyyening qestlep öltürülüshining xelqara qanungha xilapliq ikenlikini tilgha alghan pezeshkiyan, weqege «israiliye hakimiyitining jawabsiz qalmaydighan éghir chong xataliqi» dep baha bergen we sözini dawamlashturup: «zionistlarning bu tekebburluqi jawabsiz qalmaydu» dégen.

iranning diplomatiye siyasitining rayon we dunyaning muqimliqini aldinqi orungha qoyidighanliqini bildürgen pezeshkiyan, islam döletlirining israiliyening pelestinliklerge qaratqan hujumini toxtitish üchün ortaq heriket qilishning muhimliqini tekitligen.

rayonning künséri küchiyiwatqan jiddiychilikini muzakire qilish üchün iranni ziyaret qilghanliqini bildürgen sefedi, iyordaniye padishahi abdullah ikkinchining özige téhran bilen amman otturisidiki ixtilapni tügitish üchün ochuq we éniq söhbet ötküzüsh wezipisini tapshurghanliqini eskertken.

sefedi iyordaniye padishahi abdullahning salimi we muweppeqiyet tileklirini pezeshkiyangha yetküzgendin kéyin: «iyordaniye zionist hakimiyetning ghezzediki rehimsiz tajawuzchiliqini bashtin-axir eyiblep keldi» dégen.

u yene özlirining israiliyening heniyyeni qestlep öltürüshini eyibligenlikini, israiliye bash ministiri bényamin nitanyahoning qestlep öltürüsh weqesi arqiliq rayondiki toqunushning dairisini kéngeytmekchi bolghanliqini qeyt qilghan.

sefedi özining bu ziyaretni israiliyedin irangha yaki irandin israiliyege uchur yetküzüsh üchün qilghanliqi toghrisidiki dewalarni ret qildi.