israiliye liwangha hujum qildi, amérika bolsa, puqralirini agahlandurdi
israiliyening liwangha qilghan hawa hujumida 1 kichik bala qaza qilip, 6 puqra yarilandi.
türkiye awazi radiyosi xewiri: israiliye qisimlirining liwanning jenubigha qilghan hawa hujumida 1 ösmür qaza qilip, 6 puqra yarilandi.
liwan sehiye ministirliqi israiliye qisimlirining liwan chégrasigha jaylashqan deyr siriyan rayonigha qilghan hawa hujumida qaza qilghanlar heqqide bayanat élan qildi.
bayanatta 17 yashliq bir qizning qaza qilghanliqi, 6 kishining yarilanghanliqi bildürüldi.
yarilanghanlarning ichide ehwali éghirlarning barliqi we ularning rayondiki oxshimighan doxturxanilargha yollanghanliqi uqturuldi.
bu ariliqta, liwanning jenubidin israiliyege qaritip onlarche rakétamiyot qoyup bérildi.
israiliyening hawa mudapie sistémisining rakétalarni pachaqlap tashlighanliqi körüldi.
israiliye qisimliri kéchide chégra rayonigha kem dégende ikki qétim yorutush oqi atti.
israiliye qisimliri élan qilghan yazma bayanatqa asaslanghanda, liwanning jenubidin étilghan onlarche rakétaning köpinchisi pachaqlap tashlanghan.
hujumgha munasiwetlik hizbullah élan qilghan bayanatta bolsa, israiliyening shimalidiki qanunsiz olturaq rayoni beyt xillelning onlighan katyusha bombisi bilen hujum nishani qilinghanliqi bildürüldi.
hizbullah bu hujumning tünügün israiliyening liwanning jenubidiki ikki bazargha qilghan hujumigha qarita öch élish üchün élip bérilghanliqini eskertti.
yene bir tereptin, amérika qoshma ishtatlirining béyruttiki bash elchixanisi amérika puqralirigha bixeterlik agahlandurushi élan qildi. agahlandurushta «liwandin ayrilishni xalaydighanlar derhal uchidighan bélet tapalmisimu özlirige uyghun bélet sétiliwilishini tewsiye qilimiz» déyildi.
amérika tashqi ishlar ministirliqi israiliye bilen hizbullah otturisidiki jiddiylikning küchiyishi sewebidin 1 – awghustta puqralirini «liwangha sayahetke barmasliq» heqqide agahlandurghan idi.
amérika, gollandiye, hindistan, engiliye, gérmaniye, shiwitsariye, italiye, grétsiye, fransiye we polshaning awiatsiye shirketliri ottura sherqtiki eng yéngi özgirishlerdin kéyin bixeterlik sewebidin israiliyege we liwangha baridighan bir qisim ayropilanlirini emeldin qaldurghanliqini élan qilghan idi.
