israiliye ghezzede kichik balilarnimu öz ichige alghan 16 pelestinlikni shéhit qildi
israiliye qisimlirining ghezzede pelestinlikler panahliniwatqan mektepke qilghan hujumida, kichik balilarnimu öz ichige alghan 16 pelestinlik shéhit boldi.
türkiye awazi radiyosi xewiri: ghezzediki xelq mudapie etritining bayanatida, israiliye armiyesining ghezze shehirining shimalidiki sheyx ridwan rayonigha jaylashqan hamame isimlik mektepni bombardiman qilghanliqi bildürüldi.
bayanatta, israiliye qisimlirining deslepki hujumidin uzun ötmeyla oxshash rayonni 3 bashqurulidighan bomba bilen bombardiman qilghanliqi uqturuldi.
bayanatta hujumda kichik balilarnimu öz ichige alghan 16 pelestinlikning hayatidin ayrilghanliqi, nurghun kishining yarilanghanliqi bildürüldi emma yarilanghanlarning éniq sani toghrisida hazirche héchqandaq uchur bérilmidi.
israiliye qisimliri yene qamal qilinghan ghezze rayonining ottura qismidiki deyr el belah shehirige jaylashqan aqsa shéhitliri doxturxanisining hoylisida chédirlarda turuwatqan pelestinliklerni hujum nishani qildi. hujumda kem dégende 5 kishi shéhit bolup, nurghun panahlanghuchi yarilandi.
israiliyening yene ghezzede pelestinlik aililerge tewe ikki öyni hujum nishani qilishi netijiside 11 kishi shéhit boldi.
bu ariliqta, pelestin esirler jemiyiti bilen pelestin azadliq teshkilatigha qarashliq esirler we qoyup bérilgen heyiti 2023-yili 7-öktebirdin 2024-yili awghustqiche gherbiy qirghaq we quddusta qolgha élinghan pelestinlikler heqqide doklat élan qildi.
doklatta, 2024-yili awghustning bashlirighiche israiliye türmiliridiki mehbuslarning omumiy sanining texminen 9900 ikenliki bildürüldi.
yene bir tereptin, ghezzediki xelq mudapie teshkilatining üsküniliri we aptomobillirining 60% tin köprekining israiliyening hujumlirida ishletkili bolmaydighan halgha kélip qalghanliqi uqturuldi.
xelq mudapie teshkilatining yazma bayanatida, b d t bilen ötküzgen nurghun meslihet we uchrishishlar netijiside teshkilatlargha yéqilghu bilen teminlesh üchün bergen wedilirige qarimastin, éhtiyajliq yéqilghuning téxiche teminlenmigenliki otturigha qoyuldi.
