amérika israiliyening bixeterliki üchün rayongha urush ayropilanliri we paraxotlarni ewetidu
amérika dölet mudapie ministirliqi «iranning tehditliri» aldida israiliyening bixeterlikini qoghdishigha yardem bérish üchün rayongha qoshumche urush ayropilanliri we paraxotlarni ewetidighanliqini bildürdi.
türkiye awazi radiyosi xewiri: amérika qoshma ishtatliri dölet mudapie ministirliqining muawin bayanatchisi sabrina singi, ministir loyd ostinning, iranning hujum qilish éhtimalliqigha qarshi israiliyege qoshumche herbiy yardemlerni ewetish toghrisida yolyoruq chüshürgenlikini uqturdi.
amérika qoshma ishtatliri dölet mudapie ministirliqi bu yolyoruqqa asasen, «iranning tehditliri» aldida israiliyening bixeterlik tedbirlirini kücheytishige yardem béridiken, hemde nöwettiki weziyetke asasen amérikaning rayondiki herbiy mewjudiyitini qaytidin retke salidiken.
bu arqa körünüshte, ministir ostin israiliyening rayonluq bixeterlikige kapaletlik qilish paaliyetlirige qatnashqan amérika eskerliri hem herbiy islihelirining sanini köpeytish, rayongha qoshumche urush ayropilanliri we urush paraxotliri ewetish toghrisida yolyoruq chüshürgen.
amérika qoshma ishtatliri dölet mudapie ministirliqi nöwette rayonda paaliyet élip bériwatqan « USS Theodore Roosevelt» awiyamatkisining ornigha «USS Abraham Lincoln» awiyamatkisi ewetidiken.
amérika dölet mudapie ministirliqi yene rayongha ballistik bashqurulidighan bombadin mudapielinish iqtidarigha ige qoshumche sayahet paraxotliri we qoghlighuchi paraxotlarni ewetidiken, shundaqla quruqluq ballistik bashqurulidighan bombadin mudapielinish iqtidarini östüridiken.
ministir ostin ottura sherqte israiliyeni qoghdash üchün xizmet qilidighan qoshumche ayropilan etritinimu rayongha ewetidiken.
yene bir tereptin, amérika qoshma ishtatliri dölet mudapie ministirliqining yazma bayanatigha qarighanda, amérika dölet mudapie ministiri ostin bilen israiliye dölet mudapie ministiri yoaw gallant bu mesile toghrisida téléfonda söhbetleshken.
téléfon söhbitide, ostin amérika qoshma ishtatlirining israiliyening bixeterlikini qoghdash wediside ching turidighanliqini tekitligen, hemde «iran we gumashtilirining tehditliri» aldida tél awiwgha qetiy yardem bérishni dawamlashturidighanliqini eskertken.
ostin amérika qoshma ishtatlirining israiliyening bixeterlikini qoghdash üchün amérikaning rayondiki herbiy mewjudiyiti üchün tégishlik retke sélish we tengshesh xizmetlirini ishleydighanliqi toghruluq wede bergen.
yene bir tereptin, amérika dölet mudapie ministiri ostin gallantqa, «ottura sherqtiki jiddiychilikning téximu ewj élip kétishining muqerrer emesliki» ni we «rayonning weziyitining normallishishining hemmige paydiliq» ikenlikini, buning üchün ghezzede urush toxtitishning mohimliqini otturigha qoyghan.
amérika qoshma ishtatlirining 2023-yili 7-öktebirdin buyan bixeterlikke munasiwetlik barliq mesililerde israiliyeni zörür yardemler bilen teminlep kéliwatqanliqini bayan qilghan ostin, «iranning tehditliri» aldida israiliyege yardem bérishni dawamlashturidighanliqlirini tekitligen.
