meshel: heniyye mujahid süpitide yashidi, shéhit süpitide allahning dergahigha ketti
pelestin qarshiliq körsitish herikiti (hamas) ning chet el ishliri mesuli xalid meshel hamas siyasiy biyurosining reisi ismail heniyyening mujahid süpitide yashap, shéhit süpitide allahning dergahigha ketkenlikini éytti.
türkiye awazi radiyosi xewiri: meshel iranning paytexti téhranda qestlep öltürülgen ismail heniyyeni axiretke uzitip qoyush üchün, qatarning paytexti dohadiki imam muhemmed bin abdulwehhab jameside ötküzülgen murasimida qilghan sözide, heniyyening ghezze shehiridiki shati musapirlar lagérida öz xelqi arisida yashap, azab-oqubettimu, xushalliqtimu, japadimu, halawettimu xelqi bilen bille bolghanliqini tekitlep mundaq dédi:
«qimmetlik qérindishimiz, rehbirimiz, shéhit qomandan ebu elebd ismail abdussalam heniyye mujahid süpitide yashidi, shéhit süpitide allahning dergahigha ketti.»
«israiliye ötmüshtin héch ibret we sawaq almidi.»
«ular (israiliyelikler) esir boyi rehberlirimizni öltürdi, emma netijisi qandaq boldi? bir rehber shéhit bolsa, yene biri rehber uning ornini basti. qisqisi, bir shéhit dunyadin ketse, ornigha yene bir shéhit tughuldi we tughulidu. shundaq qilip, xelqimiz nijatliq hem musteqilliqqa érishish sepirini üzlüksiz dawamlashturdi we dawamlashturidu.»
tehditlerning pelestinliklerning nijatliq menzilgahigha ghelibe quchqan halda yétip bérish sepirini izchil dawamlashturushigha qilche tosalghu bolalmaydighanliqini eskertken meshel, sözini mundaq dawamlashturdi:
«tehditler bizni pirinsiplirimizdin qilche yiraqlashturuwételmeydu. pelestin sherqidin gherbigie, shimalidin jenubighiche adaqqche wetinimiz süpitide öz mewjudiyitini menggü saqlap qalidu. ular bizdin qanche ademni öltürse öltürsun, biz hergizmu muresse qilmaymiz, pirinsiplirimizdin esla waz kechmeymiz we israiliyeni étirap qilmaymiz.»
«pütün rayon we dunya israiliyening aljip, eqildin adashqanliqini emdi bilishi kérek. shunga israiliye hemme yerni qara – qoyuq hujum nishani qilmaqta. islam dunyasining rehberlirige shundaq chaqiriqta bolimenki: ümmetning hoshigha kélidighan – oyghinidighan waqti alliqachan keldi.»
