һамас келишимниң шәртлирини елан қилди

түркийә авази радийоси хәвири: һамас сийасий бийуроси әзаси исмаил һәниййә телевизийә қанили арқилиқ елан қилинған нутуқида, исираилийә билән өткүзүлүватқан музакирәләр тоғрисида мәлумат бәрди.

у һамасниң музакирәләрдә иҗабий вә мәсулийәтчан позитсийәдә болғанлиқини әскәртип, мундақ деди:

«ғәззәдә урушни ахирлаштурмиған, йурт-маканлиридин айрилғанларни өйлиригә қайтуруп кәлмигән вә дүшмәнни ғәззәниң сиртиға чекинишини капаләткә игә қилмиған келишимни түзүшни халимаймиз. бу пиринсипларниң әмәлгә ешиши вә келишимниң түзүлүши үчүн исираилийәни буниңға бойсунушқа мәҗбурлайдиған хәлқаралиқ капаләтләрниң болуши шәрт.»

у исираилийәниң келишим пиринсиплириға әмәл қилиш мәсилисидә һечқандақ капаләт беришни халимиғанлиқи үчүн һазирғичә келишим һасил қилинмиғанлиқини тәкитлиди.

у исираилийәниң йурт-маканлиридин айрилғанларниң тәдриҗий һалда өйлиригә қайтишини оттуриға қойғанлиқини, әмма буниңға мунасивәтлик ениқ мәлумат бәрмигәнликини вә ғәззәни давамлиқ иккигә бөлүватқанлиқини қәйт қилди.

у исираилийәниң пәләстин хәлқигә қарши писхикилиқ уруш йүргүзүватқанлиқини, қалаймиқанчилиқ пәйда қилип, хәлқни парчилашқа урунуватқанлиқини, әмма буниңда мувәппәқийәт қазиналмайдиғанлиқини, садир қилған барлиқ қирғинчилиқ вә ирқий қирғинчилиқларға қаримай, пәләстин хәлқини чеградин қоғлап чиқиралмиғанлиқини тәкитлиди.

у сөзиниң ахирида қуддус, ийордан дәрйасиниң ғәрбий қирғиқи вә чәт әлләрдики пәләстинликләрни әқса мәсчити вә муқәддәс җайларни нишан қилған сүйиқәстләргә қарши күрәш үчүн башланған «әқса топани» ни қоллашқа чақирди.

у ливан, йәмән вә ирақ сепидики қаршилиқ көрситишкә, әрәб вә ислам дунйасида ғәззәни қоллаш үчүн коча-мәйданларни толдуруп намайиш қилған хәлқләргә рәһмәт ейтти.