yawropa tiktokni tekshürüshni bashlidi

türkiye awazi radiyosi xewiri: yawropa ittipaqi komitéti bayanat élan qilip, «balilarni qoghdash, ashkara élan bérish, tetqiqatchilarning melumatqa ige bolushi, supining xumar qilish layihesi bilen ziyanliq mezmunlarning xeterliri» ge munasiwetlik mesililerde reqemlik xizmetler qanunigha xilapliq qilghan-qilmighanliqining tekshürülidighanliqini bildürdi.

tiktokni resmiy tekshürüsh, tiktokning séntebir (2023) de komitétqa sunghan doklat we melumat telep qilip soralghan soallargha bérilgen jawablardin kéyin élip bérilghan deslepki tekshürüsh axirlashqanda bashlandi.

bayanatta, tiktokning qoramigha yetmigenlerning namuwapiq mezmunlargha érishishining aldini élish üchün qollanghan yash tekshürüsh sistémisini öz ichige alghan bashqa tedbirlirining «yéterlik, muwapiq we ünümlük» ikenlikide guman barliqi körsitildi.

tiktokning qoramigha yetmigenler üchün yuqiri sewiyede mexpiyetlikni we bixeterlikni kapaletke ige qilish üchün muwapiq hemde yéterlik tedbirlerni yolgha qoyghan-qoymighanliqi tekshürülidu.

tiktokning xumar qilish layihesi peyda qilidighan selbiy tesirlirining balilar heq-hoquqining qoghdilishigha, shexsning jismaniy we rohiy saghlamliqigha, radikallishishqa körsitidighan selbiy tesirlirimu tekshürülidu.

yuqiriqilardin bashqa, tiktoktiki élanlarning reqemlik xizmetler qanunigha uyghun yaki emesliki, tetqiqatchilarning ammigha échiwétilgen melumatlargha érishelishide «gumanliq yétersilikler», tekshürüsh témilirining ichidin orun alidu.

yawropa ittipaqining awghust (2023) éyida ijra qilinishqa bashlanghan qanuni, reqemlik supilargha qattiq belgilimilerni keltürgen idi.

yawropa ittipaqi qanun belgilimilirige xilapliq qilghan reqemlik supilargha dunya miqyasidiki meblighining %6 ge teng kélidighan sewiyegiche jerimane qoysa bolidu. xilapliq qilmishlar tekrar yüz bergen ehwalda supilarni yawropa ittipaqida paaliyet qilishini chekleydu.