nétanyahu: hamasning telipini qobul qilish israiliye üchün yéngi bir qirghinchiliqqa yol achidu
hamasning urush toxtitish teklipige qarshi chiqqan israiliye bash ministiri bényamin nétanyahu ghezzede öy - makanliridin ayrilghan pelestinlikler panahliniwatqan refah shehirige hujum teyyarliqi qilishi üchün armiyege buyruq chüshürgenlikini élan qildi.
türkiye awazi radiyosi xewiri: bash ministir bényamin nétanyahu urush toxtitish we özara esir almashturush teklipi sunghan hamasning telipini qobul qilishning, israiliye üchün yéngi bir qirghinchiliqqa yol achidighanliqini ilgiri sürüp, ghezzening jenubidiki refah shehirige hujum qilish teyyarliqi üchün armiyege buyruq chüshürgenlikini éytti.
nitaniyahu hamasning urush toxtitish teklipi toghrisida amérika tashqi ishlar ministiri antoni blinkén bilen ötküzgen uchrishishtin kéyin, muxbirlarni kütüwélish yighini chaqirdi.
u ghezze rayonidiki israiliyelik esirlerning aile-tawabiatlirigha xitab qilip, hamasning teleplirining emeliyetke uyghun emeslikini we herbiy bésimni dawamlashturushning esirlerni qayturup kélish üchün birdinbir tallash ikenlikini, hamasning telipini qobul qilsa, esirlerni qoyup bermeydighanliqini we eksiche yéngi bir qirghinchiliqni keltürüp chiqiridighanliqini ilgiri sürdi.
israiliye bash ministiri ghezzege qiliniwatqan hujumlarning bir nechche ay ichide netijige érishidighanliqini ilgiri sürüp, özlirining nishanidin yanmaydighanliqini tekitlidi.
nitaniyahu ghezzening jenubida 1 milyondin artuq öy-makanliridin ayrilghan pelestin puqrasi panahliniwatqan refah shehiri heqqide toxtilip: «biz israiliye armiyesige refah we merkiziy lagérlargha hujum qilish teyyarliqi qilishi üchün buyruq chüshürduq» dédi.
