xitay shirketliri amérikada zeherlik chékimlik etkeschiliki bilen shughullandi

türkiye awazi radyosi xewiri:  amérika edliye ministirliqining bayanatida, merkizi xitayda turushluq 4 ximiyelik shirket we xitay puqrasi 8 kishi üstidin jinayi ishlar erzi sunulghanliqi bildürüldi.

bayanatta, mezkur kishiler we shirketlerge qaritilghan eyibleshlerning zeherlik chékimlikke qarshi küresh ​​ tarmaqliri élip barghan tekshürüsh jeryanida 200 kilogiramdin artuq féntanil yasashqa ishlitilidighan ximiyilik maddilar qolgha chüshürülgendin kéyin otturigha qoyulghanliqi bildürüldi.

bayanatta musadire qilinghan 200 kilogiram ximiyelik maddining texminen 25 milyon amérikiliqni öltürüshke yétidighanliqi tekitlendi.

edliye ministiri mérrik garlandning  dölette fantanil etkeschilikini axirlashturush üchün ishlepchiqirishtin sétishqiche bolghan her bir basquchni közitip kéliwatqanliqini éytti.

garland buning üchün méksika shaykilirighila emes, belki öz nöwitide yene bu shaykilarni fantanil ishlepchiqirishqa kéreklik matériyallar bilen teminlewatqan merkizi ishxanisi xitayda turushluq ximiyelik shirketlernimu iz qoghlap közitiwatqanliqini bildürdi.

garland amérikada tunji qétim xitay shirketlirining fantanil etkeschiliki bilen eyiblengenlikini éytti.

nyuyork jenubiy sot mehkimisining mupettishi damian williyamismu eyiblengen shirketlerde ishleydighan bir ijraiye emeldari we sétish dériktorining qolgha élinghanliqini bildürdi.

amérika késelliklerning aldini élish we kontrol qilish merkizining doklatigha asaslanghanda, amérikada her küni 150 din artuq kishi féntanil qatarliq birikme zeherlik chékimlikliri sewebidin qaza qilidiken.

birikme aghriq peseytish dorisi süpitide ishlitilidighan we morfindin 100 hesse küchlük bolghan fantanil eger 2 milligram istémal qilinsa, ejellik aqiwetler kélip chiqidighanliqi bildürülmekte.