amérikada «kowid – 19» yuqumi yardem meblighi oghrilanghan
amérika qoshma ishtatlirida korona mezgilide «kowid – 19» yuqumi yardem meblighidin 280 milyard dollardin artuq pulning oghrilanghanliqi we 123 milyard dollardin artuq pulning israp qilinghanliqi bildürüldi.
türkiye awazi radiyosi xewiri: AP agéntliqining xewirige qarighanda, amérika hökümiti «kowid – 19» yuqumini dawalash ishlirigha yardem bérish üchün jemiy 4 tirilyon 200 milyard dollar ajratqan.
agéntliqning «amérika tarixidiki eng chong aldamchiliq» dep atighan xewiride bildürülüshiche, amérika hökümiti ajratqan 4 tirilyon 200 milyard dollarliq mebleghdin 280 milyard dollardin artuq pul oghrilanghan, 123 milyard dollardin artuq pul israp qilinghan.
teptishler we mutexessisler bolsa «kowid – 19» yuqumi otturigha chiqqan deslepki mezgillerde yardem üchün ajritilghan mebleghni tézdin teqsim qilishqa tirishqan amérika hökümitini eyiblep, yardem iltimasigha chek qoyushning nahayiti az, nazaretchilikning yéterlik bolmighanliqini, buning aldamchilarning ishigha yarighanliqini ilgiri sürgen.
alaqidar tarmaqlarning bildürüshiche, aldamchilar türmilerdiki mehbuslar we qaza qilghanlarning ijtimaiy kapalet nomurini ishlitip, ishsizliq teminatigha érishken, bu aldamchilar dölet miqyasidiki nurghun ishtatlardimu shundaq qilghan.
amérika edliye ministirliqi «kowid – 19» yuqumi aldamchiliqlirigha qarshi küresh bölümining yardemchi dériktori mayk galdo yardem meblighining oghrilinishi toghrisida mundaq dégen: «bu misli körülmigen derijidiki bir aldamchiliqtur.»
igilinishiche, washingiton hökümiti hazirghiche eskerler, poplar, bashqa emeldarlar we jinayetchilerni öz ichige alghan 2230 din artuq ademni aldamchiliq bilen eyiblep, tekshürüshke bashlighan bolup, ularning arisidiki minglarche kishini tekshürüsh hazirmu dawamlashmaqta iken.
